Ерөнхийлөгчийн санал хэлэлцэж буй төсөлд хөндөгдөөгүй гэж үзэв

М.Хангал | Zindaa.mn
2019 оны 07 сарын 17

Үндсэн хуульд оруулах нэмэлт, өөрчлөлтийн төслийн хүрээнд Нутгийн удирдлагын тогтолцоог боловсронгуй болгохтой холбоотой нэмэлт, өөрчлөлтийн ажлын дэд хэсэг өнөөдөр /2019.07.17/ хуралдлаа.

Хурлаар Монгол Улсын Ерөнхийлөгчийн өргөн мэдүүлсэн төсөл, санал дахь нутгийн удирдлагын тогтолцоог боловсронгуй болгохтой холбоотой зүйл, заалтуудыг нэг бүрчлэн хэлэлцэж, үндэслэл тайлбараа боловсруулсан юм. Тодруулбал, Ерөнхийлөгчийн өргөн мэдүүлсэн төслийн  13.1, 13.2, 57.1, 57.2, 57.3, 58.1, 58.2, 59.2, 59.3, 60.1, 60.2, 60.3, 60.4, 61.1, 61.2, 61.3, 61.4, 62.1, 62.3, 63.1, 63.2  гэсэн зүйл, заалтуудыг хэлэлцлээ.

УИХ-ын гишүүдийн өргөн мэдүүлсэн төслөөр Нутгийн удирдлагын тогтолцоог боловсронгуй болгохтой холбоотой 7 зүйл, заалтыг хөндсөн бол Ерөнхийлөгчийн өргөн мэдүүлсэн төсөлд Нутгийн удирдлагын тогтолцоог боловсронгуй болгохтой холбоотой 22 зүйл, заалтыг хөндсөн байна. Ерөнхийлөгчийн өргөн мэдүүлсэн төслийн зарим зүйл, заалтыг агуулгын хувьд дэмжиж болох боловч, одоо хэлэлцэж буй Үндсэн хуульд оруулах нэмэлт, өөрчлөлтийн төсөлд хөндөөгүй. Одоогийн Үндсэн хуулийн үзэл баримтлалыг шууд хөндөж байгаа тул цаашид судалж үзэх шаардлагатай гэж ажлын дэд хэсгийн гишүүд үзлээ.  Мөн зарим зэрэгцүүлэн хэлэлцэх боломжтой зүйл, заалтууд дээр Ажлын дэд хэсгийн гишүүд үг хэлж, саналаа нэгтгэсэн юм.

Ингээд ажлын дэд хэсгийн санал, тайлбараа Монгол Улсын Үндсэн хуульд оруулах нэмэлт, өөрчлөлтийн төслийг хоёр, гурав дахь хэлэлцүүлэгт бэлтгэх Ажлын хэсэгт хүргүүлэхээр тогтлоо.

Сэтгэгдэл ( 0 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top