Б.Энхбаяр: Ерөнхийлөгчийн оруулж ирсэн өөрчлөлтөд сөрөг үр дагавар бий

УИХ-ын 2019 оны 72 дугаар тогтоолоор байгуулагдсан Монгол Улсын Үндсэн хуульд оруулах нэмэлт, өөрчлөлтийг хэлэлцүүлэгт бэлтгэх ажлын хэсэг өнгөрсөн баасан гарагт анхны хуралдаанаа хийсэн билээ.

Энэхүү Ажлын хэсгийг Монгол Улсын Ерөнхийлөгч ахалж байгаа бөгөөд өнөөдрөөс /2019.07.22/ эхлэн шахуу хөтөлбөртэй ажиллахаар төлөвлөөд байгаа юм. Тодруулбал, өнөөдөр Төрийн ордонд Гүйцэтгэх эрх мэдлийн хариуцлагыг нэмэгдүүлж, тогтвортой байдлыг хангахтай холбоотой нэмэлт, өөрчлөлтийн хэлэлцүүлгийг зохион байгуулж байна.

Энэхүү хэлэлцүүлэгт Хууль зүй, дотоод хэргийн дэд сайд асан Б.Энхбаяр нар оролцож байна. Тэрбээр энэ үеэр өөрийн байр суурийг дөнгөж сая хэвлэлийнхэнд илэрхийллээ. 

Хууль зүй, дотоод хэргийн дэд сайд асан Б.Энхбаяр хэлэхдээ "УИХ-ын 62 гишүүн, ард иргэд нийтээрээ дэмжиж байгаа зүйл бол давхар дээлийг хязгаарлах. Үндсэн хуулийн өөрчлөлтийн гол зүйл нь тогтвортой, хариуцлагатай Засгийн газрыг байгуулдаг болох чиглэлд хийж байна. Харин энэ агуулга, зарчмыг нь барих юм бол УИХ-аас оруулж ирсэн нь давхар дээлийг таван хүнээр хязгаарлах нь боломжтой санал байна. Учир нь, Үндсэн хуулийн өөрчлөлтийг нэг нам дангаараа шийдэх гэж байна гэж өрөөсгөл харж болохгүй. Үндсэн хуулийн өөрчлөлтийг дор хаяж 20-30 жил, цаашлаад 200-300 жилээ харж хийх ёстой" гэв.

Түүнчлэн "Нөгөө талаасаа Ерөнхийлөгчийн оруулж ирсэн хуулийн төсөл сөрөг үр дагавар үүсэх эрсдэлтэй. Өөрөөр хэлбэл, Ерөнхий сайд ганцаараа давхар дээлтэй байхаар тусгасан байна. Энд хэн ч олонх болохгүй үед улс төрийн намууд Засгийн газраа бүрдүүлэхийн тулд эсрэгээрээ Засгийн газраа тэлж, магадгүй 10 биш 20 яам байгуулах, нэг дэд сайд биш 2, 3 дэд сайдтай байх, бүр данхар бүтэцтэй Засгийн газрыг байгуулах эрсэлдтэй. Ерөнхий сайдаа хүртэл томилж чадахгүй, парламент тарах улс төрийн тогтворгүй байдлын эрсдэл бий" хэмээн онцоллоо.