Үндсэн хуулийн хэлэлцүүлэг сөрөг хүчингүйгээр үргэлжилнэ

УИХ-ын чуулганы нэгдсэн хуралдаанаар Үндсэн хуульд оруулах нэмэлт, өөрчлөлтийн төслийн хоёрдугаар хэлэлцүүлгийг хийж дууссан. Харин УИХ дахь АН-ын зөвлөлөөс уг төслийн хэлэлцүүлэгт оролцох боломжгүй гэдгээ мэдэгдлээ.

Энэ талаар УИХ дахь АН-ын зөвлөлийн дарга Д.Эрдэнэбат “Үндсэн хуульд оруулах нэмэлт өөрчлөлтийн зөвшилцөл хэлэлцүүлгийн явцад АН-ын зарчмын байр суурийг илэрхийлсэн саналуудыг УИХ хүлээж авалгүй унагаасан. Бид анх зарчмын байр сууриа илэрхийлэхдээ Үндсэн хуулийн нэмэлт өөрчлөлт нь өөрөө Ардчилсан нийгмийнхээ төлөв байдлыг төлөвшүүлэх, Үндсэн хуулиа улам сайжруулах, хууль батлагдсанаас хойших 27 жилийн хугацаанд гарч байгаа алдаанд сургамж авч, үүнийгээ засаж сайжруулах чиглэлээр зарчмын гурван том байр суурийг илэрхийлсэн байдаг” хэмээн мэдээллийнхээ эхэнд онцоллоо.

Тэрбээр “Нэгдүгээрт, хэрвээ бид нар үнэхээр энэ парламентын засаглалтай сонгодог парламенттай улс орон болж байгаа нь үнэн юм бол Ерөнхийлөгчийг парламентаас сонгодог байх нь бүх олон улсын жишигт орох ёстой гэсэн байр сууриа илэрхийлсэн. Хоёрдугаарт, одоогийн парламентыг тогтвортой, бодлоготой байлгая гэвэл улс төрийн намыг төлөвшил, хариуцлага зайлшгүй шаардлагатай. Ингэснээр улс төрийн намууд энэ төлөвшлийг дагаж, УИХ өөрөө бодлогын байгууллага болж, зөв зам руугаа орно гэж бид үзэж, сонгуулийн тогтолцоо дээр байр сууриа байнга илэрхийлж ирсэн. Харамсалтай энэ зарчмын гол байр суурь болох эдгээр саналуудыг хүлээж авалгүй чуулган дээр уналаа.  Тиймээс АН-ын зөвлөл цаашид энэ чуулганы хэлэлцүүлэгт оролцох боломжгүй” гэв.