Ерөнхийлөгчийн хоригийг хүлээж авах, эсэхийг шийдсэний дараа хуралдана

Автор | Zindaa.mn
2019 оны 09 сарын 23

Ард нийтийн санал асуулга явуулах хугацаа, зардал, зохион байгуулалтын асуудлыг Ерөнхийлөгч, Ерөнхий сайд болон улс төрийн намуудтай зөвшилцөж, УИХ-ын тогтоолын төсөл боловсруулах Ажлын хэсгийн хурал өнөөдөр /2019.09.23/ Төрийн ордонд боллоо.

Хурлыг даргалагч УИХ-ын гишүүн Д.Лүндээжанцан УИХ-ын гишүүд энэ сарын 23-ны өдрийг хүртэл тойрогтоо ажиллаж, ард нийтийн санал асуулгад оруулах Монгол Улсын Үндсэн хуулийн нэмэлт, өөрчлөлтийн эхийг иргэдэд сурталчлах, тайлбарлан таниулах ажил хийж байгааг дурдаад, Ард нийтийн санал асуулгад оруулах Үндсэн хуулийн нэмэлт, өөрчлөлтийн эхийг ард нийтэд таниулах, мэдээллээр хангах ажлын ерөнхий төлөвлөгөөний төсөл бэлэн болсон тухай танилцуулсан юм.

УИХ-ын Төрийн байгуулалтын байнгын хорооны хурлаар иргэдээс санал авах өдрийг энэ сарын 30, 31 байж болно гэж үзсэн. Ард нийтийн санал асуулга явуулах төсвийн хувьд Сонгуулийн ерөнхий хороо нэгтгэж байгаа аж. Гэхдээ есдүгээр сарын 20-ны өдөр тавьсан Ерөнхийлөгчийн хоригийг 14 хоногийн дотор хэлэлцэх хуультай тул энэ асуудлыг эцэслэн шийдсэний дараа Ажлын хэсэг хуралдахаар боллоо.

Сэтгэгдэл ( 0 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top