Азийн зах зээл дээр Оросын нүүрсний үнэ унажээ

Энэ оны дөрөвдүгээр сард Азийн зах зээл дээр Оросын нүүрсний үнэ өнгөрсөн сартай харьцуулбал 12 хувиар буурчээ. Энэ нь тус бүс нутагт нүүрсний эрэлт буурсантай холбоотой гэж Argus агентлаг мэдээлжээ.

Дөрөвдүгээр сарын 21-ний байдлаар, Оросоос зургаан мянган ккал илчлэгтэй нэг тонн нүүрний экспортын үнэ 59.94 ам.доллар болсон бол гуравдугаар сарын сүүлээр 68.06 ам.долларт хүрч байжээ. Энэ нь 2016 оны зургаадугаар сараас хойш хугацаанд бүртгэгдэж буй хамгийн доод үнэ юм. Үүний зэрэгцээ 5.5 мянган ккал илчлэгтэй Оросын нүүрсний үнэ мөн есөн хувиар буурч, нэг тонн нь 51.13 ам.доллар болсон байна. Оросын түлшний үнэ буурсан нь коронавирусний цар тахлын улмаас аж үйлдвэрлэл, эдийн засгийн үйл ажиллагаа суларснаас үүдэн Азийн томоохон нүүрсний хэрэглэгч орнуудад эрэлт буурсантай холбоотой. Түүнчлэн, Хятад улсад нүүрсний хэт нийлүүлэлт үүссэн нь Хятадын эрх баригчдыг хэд хэдэн боомтоор нүүрс импортлохыг түр зогсооход хүргэжээ.

Гэхдээ Оросын үйлдвэрлэгчид олборлолт буурах, үйлдвэрлэлийн зардал нэмэгдэх, агуулах дүүрэхээс урьдчилан сэргийлэх зорилгоор хямд үнээр нүүрс нийлүүлэхэд бэлэн байна. Оросын эрчим хүчний нүүрсний үнэ Европын зах зээл дээр мөн 11 хувиар унаад байна.