Ким Жон Ун: АНУ бидний гол дайсан

БНАСАУ-ын удирдагч Ким Жон Ун АНУ нь БНАСАУ-ын гол дайсан гэж нэрлэсэн тухай БНСУ-ын Ёнхап агентлаг мэдээлжээ.

Ким Жон Уны хэлснээр, Пёньяны талаар баримталж буй Вашингтоны бодлого АНУ-ын удирдах албан тушаалыг хашиж буй хүмүүсээс үл шалтгаалан өөрчлөгдөхгүй бөгөөд хоёр улсын харилцааг сайжруулах зам нь Вашингтон дайсагнасан бодлогоос татгалзах явдал юм гэжээ.

Хойд Солонгосын удирдагч Солонгосын Хөдөлмөрийн намын 8-р их хурал дээр тавьсан илтгэлдээ Хойд Солонгос цөмийн шинэ шумбагч онгоц барьж дууссан тухай мэдэгджээ.

Хойд Солонгосын Мэдээллийн төв агентлагийн (KCNA) мэдээлснээр, цөмийн зэвсгийн хэмжээ, жинг багасгахаас гадна Пёньяны гол зорилго бол цөмийн зэвсгийн стратеги хүчин чадлыг нэмэгдүүлж, тусгалын тойргийг 15 мянган км болгох явдал юм гэж Ким Жон Ун мөн мэдэгджээ. Түүний хэлснээр, цэргийн шинжлэх ухааны өмнө тавигдсан гол зорилго нь Ардын армийг хүчтэй, орчин үеийн болгох үүднээс цэргийн технологийг хөгжүүлж, тэргүүний зэвсэглэл, техникийг бүтээх явдал юм гэжээ.

Ким Жон Ун мөн БНХАУ, ОХУ-тай хоёр талын харилцааг бэхжүүлэн, хөгжүүлэх болно гэж мэдэгдсэн байна. Тэрбээр эрин үеийн шаардлага нэг хувь заяагаар холбогдож, нийтийн аюулын эсрэг тэмцэлд нэгдсэн БНХАУ, БНАСАУ-ын хоёр ард түмэн, хоёр намын ах дүүгийн найрамдал, нягт хамтын ажиллагааг үргэлжлүүлэхийг шаардаж байна гээд Хойд Солонгос ОХУ-тай харилцах харилцаандаа шинэ дэвшилд хүрэхийг эрмэлзэж байна гэв.

Солонгосын Хөдөлмөрийн намын ээлжит их хурал энэ сарын 5-нд эхэлсэн билээ. Өмнөх их хурал 2016 онд болсон бөгөөд хурлын үйл ажиллагаа дөрвөн хоног үргэлжилж байв.