SUN MEDICAL ЗӨВЛӨЖ БАЙНА | Нүдэнд өвдөг гарсан үед анхаарах зүйлс

"SUN MEDICAL center Ulaanbaatar" буюу "Сон Медикал Центр Улаанбаатар" эмнэлэг, Zindaa.mn сайт хамтран эрүүл мэндийн зөвлөмжүүдийг уншигч та бүхэнд цувралаар хүргэж байна.

Танд нүдний өвдөг гарах шалтгаан, анхаарах зүйлс, түүнээс хэрхэн сэргийлэх талаар мэдээллийг хүргэе.

НҮДНИЙ ӨВДӨГ

Өвдөг (Stye / Hordeolum) нь сормуусны уг буюу фолликул болоод булчирхайг хамарсан цочмог үрэвслийг хэлдэг. Үрэвсэл зовхины хаана байрласнаас хамааран дотор болон гадна өвдөг гэж ангилна.

Зураг 1. Гадна өвдөг

Зураг 2. Дотор өвдөг

Товчирсон өвдөг (chalazion) нь зовхинд байрладаг мейбомын булчирхайн (жижиг тосны булчирхай) бөглөрсний улмаас үүсдэг архаг үрэвсэл бөгөөд өөрөө аяндаа эсвэл өвдөг үүссэний дараа үүсч болно.

Зураг 3. Мейбомын булчирхай. Энэхүү тосны булчирхайнаас ялгардаг шингэн тос нь нүдний гадаргуугийн чийгшилд чухал үүрэгтэй.

Зураг 4. Халазион.

Шинж тэмдэг
 

• Зовхи өвдөлт, хөндүүртэй болох
• Улайх
• Хавдах
• Халуун оргих
• Харин халазионы буюу товчирсон өвдөг гарсан үед улайлтгүй, хавдаргүй хирнээ хөндүүргүй зангилаа үүссэн байдаг.

Эмчилгээний үндсэн зарчим

Өвдөг, халазион нь ихэвчлэн эмчилгээ шаардахгүйгээр өөрөө эдгэдэг хэдий ч шаардлагатай тохиолдолд эмчилгээ хийнэ.

Гэрээр ямар арга хэмжээ авч болох вэ?
 

• Өдөрт 4 удаа 3-5 минутаар бүлээн жин тавих.
• Зовхины ирмэг буюу сормуусны дагуу массаж хийж булчирхай нээгдэж, бөглөрсөн агууламж нь гадагш гарахад дөхөм болгох.

Эмчийн зөвлөмжийн дагуу дараах эмчилгээг шаардлагатай үед хийнэ
 

• Халдвар сэжиглэж байгаа буюу зовхины өвдөлт хөндүүртэй тохиолдолд тухайн хэсэгт болоод зовхины ирмэгийн дагуу нүдний хэсгийн үйлчилгээтэй антибиотиктой тосон түрхлэг, дусаалга хэрэглэх.
• 3-4 долоо хоногийн дотор эдгэхгүй байгаа тохиолдолд мэс заслын аргаар зүслэг хийн эмчилнэ. 

Анхаарах зүйлс
 

• Амьтны үс, сахалаар нулимсны сүв, нүдрүү хэрхэвч хатгаж болохгүй. Энэ нь бохир учир үрэвслийг улам хүндрүүлэх аюултай.
• Өвдөг, халазионыг гэрээр өөрөө шахахгүй байх.
• Нүдний мэргэжлийн эмчээс зөвлөгөө авч эмчилгээ хийх.

Хэрхэн урьдчилан сэргийлэх вэ?
 

• Зовхины ирмэгийн бохирдлыг өдөр бүр цэвэрлэж байх.
• Зовхинд бүлээн жин тавих.

Зовхинд зөөлөн иллэг хийх зэрэг нь урьдчилан сэргийлэхэд тус болно.