ТӨСӨВ 2022: Эрүүл мэндийн сайдад 1.4 их наяд төгрөг зарцуулах эрх олгохоор тусгажээ

Ковидын эрсдэлийг бууруулах зорилгоор энэ онд төсвийн зардлыг 1.5 их наяд төгрөгөөр нэмэгдүүлэн тодотгосны тэн хагас нь Эрүүл мэндийн салбар руу шууд чиглэсэн санхүүжилтүүд байсан билээ.

Гэвч тодотгол батлагдсанаас хойш гурван сарын хугацаанд  цар тахлын нөхцөл байдал илүү хүндэрсэн. Тэр хэрээр эрүүл мэндийн салбарт  цаашид шаардагдах зардын хэмжээ өсч байна. Ер нь ковидоос үүдэн нийгмийн эрүүл мэнд байнга эрсдэлд байж, эрүүл мэндийн салбарын төсөв ч жилээс жилд өсч буй юм.

• 2019 онд улсын  төсвөөс эрүүл мэндийн салбарт 939.9 тэрбум төгрөг хуваарилж байсан бол 2020 онд 1 их наяд 8.6 тэрбум төгрөг тусгасан.

• Харин энэ 2021 онд 742.9 тэрбум төгрөгийн зардал эхэлж баталсан бол төсвийн  тодотголоор 735 тэрбум төгрөгийн зардал нэмэгдүүлсэн юм. Тэгснээр нийтдээ энэ онд эрүүл мэндийн салбар улсын төсвөөс 1.477.9 тэрбум төгрөг авч байгаа юм.

Тэгвэл ирэх 2022 оны төсвийн төсөлд эрүүл мэндийн салбарын төсвийг хэрхэн тусгаад буйд анхаарал хандуулъя.

2022 онд Эрүүл мэндийн даатгалын сангийн орлогыг 1,450.8  тэрбум  төгрөг  байхаар  тооцжээ.Засгаас өгч буй мэдээлэлд “Эрүүл  мэндийн салбарын шинэчлэлийн хүрээнд  2021  оноос  нэг  худалдан  авагчийн  тогтолцоонд  шилжиж  улсын  төсвөөс  эрүүл мэндийн даатгалын санд тусламж,  үйлчилгээний санхүүжилтийг шилжүүлж  байна.  Үүний  дагуу  эрүүл  мэндийн  даатгалын  сангийн  орлогод  улсын  төсвийн  шилжүүлэг,  эрүүл  мэндийн  даатгалын  сангийн  шимтгэлийн  орлого  аж,  ахуйн  нэгж  байгууллага,  төсөвт  байгууллага болон даатгуулагчаас төлөх  шимтгэлийн орлогыг тус тус тусгалаа” гэж байна.

Харин Эрүүл мэндийн даатгалын сангийн зарлагын тухайд дараах мэдээллийг өгч байна.   Эрүүл  мэндийн  салбарын  шинэчлэлийн хүрээнд  эрүүл  мэндийн  тусламж,  үйлчилгээний  санхүүжилт,  анхан  шатны  эрүүл  мэндийн  байгууллагын  нэг  иргэний  тарифаар  тооцох  зардлыг    тусгасан.  Бүх  шатны  эмнэлгийн  иргэнд  үзүүлсэн  эрүүл  мэндийн тусламж, үйлчилгээний чанар, үр дүн,  гүйцэтгэлээр  олгох  санхүүжилтэд  нийт 1,358.4 тэрбум төгрөг төсөвлөсөн байна. Эрүүл мэндийн тухай хуулийн 15 дугаар  зүйлийн  15.1.1,  15.1.2,  15.1.4,  15.1.5,  15.1.7,  15.1.9,  15.1.11,  15.1.13-д тус тус  заасан  эрүүл  мэндийн  байгууллагын  эмчийн бичсэн  жороор  хөнгөлөлттэй  олгох эмийн нэр төрөл, жагсаалтын дагуу  олгох эмийн үнийн хөнгөлөлтийн зардалд  67.3  тэрбум  төгрөг,  эрүүл  мэндийн  даатгалын  сангийн  эрсдэлийн  сангийн  хөрөнгийг 40.0 тэрбум төгрөг байхаар тус  тус тооцжээ.

Тодруулбал, төсвийн ерөнхийлөн захирагч буюу Эрүүл мэндийн сайдад ирэх онд 1,481,3 тэрбум төгрөгийн төсөв зарцуулах эрх олгохоор төсөлд тусгаад байна.

• Эрүүл мэндийн байгууллагуудад олгох тусламж  үйлчилгээний санхүүжилт - 1,358,4 тэрбум  

• Эмийн санд олгох - 67,3 тэрбум  

• Үйл ажиллагааны урсгал зардал -  14,1 тэрбум

• Нийгмийн даатгалын байгууллагад олгох - 1,1 тэрбум

• Бусад – 480 сая

• Эрсдэлийн сан  - 40 тэрбум  төгрөг байхаар тус тус тусгасан байна.

Мөн төсвийн төсөлд Эрүүл  мэндийн  даатгалын  сангийн  Капитал  банкнаас  авах    авлагыг барагдуулахаар тооцож тусгажээ.

Тодотгоход, энэ оны төсвийн тодотголоор баталсан мөнгөнөөс ковидын эмчилгээнд шаардлагатай байсан тоног төхөөрөмжүүдээ худалдан авсан байх ёстой. Тухайлбал, тэрбум төгрөгийг нь халдварын тархалт нэмэгдсэнтэй уялдан гарч байгаа хүндрэл бэрхшээлийг шийдвэрлэх зорилгоор  шаардлагатай ECMO, CRRT, амьсгалын аппарат, хүчилтөрөгчийн бэсрэг үйлдвэр, хүчилтөрөгч өтгөрүүлэгч, нийслэлд нэмэлтээр ковидын 2,000 ор дэлгэхэд шаардагдах зардалд зарцуулна гэж Сангийн яамнаас мэдэгдэж байсан билээ.