Хорвоод төрүүлсэн хэмээн эмчийг шүүхдэж, нөхөн төлбөр авахаар болжээ

Их Британийн алдарт морь унаач Эви Тумбс ээжид нь жирэмсний хяналт тавьж байсан эмчийг шүүхэд өгч, олон сая фунтын нөхөн төлбөр авахаар болжээ.

“The Telegraph” хэвлэлд мэдээлснээр, өдгөө 20 настай Эви эхээс Spina bifida нурууны согогтой төржээ. Энэ эмгэгтэй хүний хөл саажиж, шээс задгайрах өвчтэй болдог байна.

Нэхэмжлэлд дурдсанаар, эмч Филип Митчелл ээжид нь жирэмслэхээс өмнө болон жирэмсний эхний гурван сард фолийн хүчил бичиж өгөөгүйн улмаас ирээдүйн хүүхдийнх нь эрүүл мэндэд учрах үр дагаврын талаар анхаарал тавиагүй гэжээ. Хүүхдийн эрүүл мэнд эрсдэлтэй тохиолдолд жирэмслэлтийг зогсоох боломжтой байсан гэж хохирогч үзэж байна. Эви хорвоод мэндэлснээ алдаа байсан, үүнд эмчийн ажилдаа хайхрамжгүй хандсан нь давхар нөлөөлсөн гэж мэдэгджээ.

Лондонгийн Өндөр шүүхийн шүүгч Розалинд Коу хэрэв Эвигийн ээжид зөв зөвлөгөө өгсөн бол жирэмслэх хугацаагаа хойшлуулж, эрүүл хүүхэд төрүүлэх боломжтой байсан гэж үзсэн байна. Шүүх Эвид бүх насаараа авах эмнэлгийн үйлчилгээний зардлаа нөхөн төлүүлэх эрх олгожээ. Одоогоор нөхөн төлбөрийн хэмжээг тогтоогоогүй байгаа бөгөөд олон сая фунт болно гэж хэвлэлд онцолсон байна.

Энэхүү хэрэг нь шүүхийн практик шинэ жишиг тогтоож байна гэж шинжээчид үзэж байна. Ажилдаа хайхрамжгүй ханддаг эмч нарт хариуцлага тооцох боломжийг нээх юм.