ОЛОН ӨНГӨ: Монголчуудыг нэгтгэх өөр шашин хэрэгтэй байна

Монголчууд шиг муу хүмүүс энэ дэлхий дээр байхгүй мэт л муулдаг болсон, бид өөрсдийгөө. Муу муухай зан чанарыг нь хэмжвэл дэлхий даахгүй болсон талаарх яриаг өөрсдөө гаргадаг. Бид ингэтлээ ухамсрын доройтолд орж, өөрсдийгөө үнэлэх үнэлэмжгүй болжээ. Монгол хүн өөрийгөө үнэлэхгүй байхад гаднынхан сайн нүдээр харна гэж лав байхгүй. Яагаад гэвэл бидэнд үнэт зүйл, нэгтгэх үзэл санаа алга. Бидэнд байгаа ардчилал, популизм аль аль нь энэ хэрэгцээг хангаж чадахгүй байна. Зүгээр л хуураад өнгөрдөг боллоо.

Тэгвэл үүнийг шашны тусламжтай бий болгож чадсан улс үндэстэн олон.

Жишээ нь, буддизм нэвт шингэсэн Азийн зарим орныг хэн нэгэн удирдагч бус тэр үзэл санаа л залж чиглүүлж байдаг. Баян ядуу нь хамаагүй бүгд үзэл санаандаа үнэнч. Бидний муугаар боддог лалын ертөнцөд хүртэл шашны номлол нь хууль болж өргөжиж хөгжсөн. Тэнд эв нэгдэл, нэгдсэн үзэл дэлхийн аль ч өнцгөөс өндөр байгаа нь харагддаг. Гэтэл манайхны олонх нь шүтдэг гэх шарын шашин тэс ондоо. Тэнд ямар нэг тулшрал байдаггүй. Мэдээж, туйлшрал байхгүй учраас нэгдсэн үзэл санаа бий болгож чаддаггүй. Бас сүсэг бишрэлийг төлбөр мөнгөөр авахыг тулгадаг.

Татварын төлөгчдийн мөнгөөр хөшөө болгохыг шаардаж нийгмээр нь талцуулах жишээний. Тиймээс тэр олон шар бурхан оюун санааны хувьд хүндлэл хүлээхгүй байна. Хэт материаллаг болж философийн утгаа алдсан учраас ямар нэг төлөвшил, хөгжилд хөтлөх чадваргүй болчихсон.   Уг нь шашин өөрөө хүмүүсийн дунд тогтвортой ёс суртахуун тогтоож, сүсэг бишрэлийн хэрэгцээг нь хангаж байдаг ач холбогдолтой зүйл.

Тодруулбал, хатуу хууль бус зөөлөн бодлогоор хүмүүсийн хоорондын харилцааг зохицуулах төдийгүй бие хүнийг төлөвшүүлэх, түүний хувийн ухамсар, ертөнцийг үзэх үзэл төлөвшихөд идэвхтэй нөлөө үзүүлэх чадвартай эд. Ийм чадвартай нэг сургаалиар хүмүүжсэн улсууд үндэстэн нэг үзэл санаатай болж, нэгдмэл цул болж чадна.