“Рио Тинто” компани “TRQ”-ийн 49%-ийг худалдан авах дүнгээ $600 саяар өсгөж, ТОХИРОЛЦООНД хүрлээ

Оюутолгой төслийн менежментийг хэрэгжүүлэгч “Рио Тинто” болон хөрөнгө оруулагч “Туркойз Хилл Ресурс”-ийн хооронд сүүлийн зургаан сар орчим үргэлжилж буй хувь эзэмшлийн өөрчлөлтийн асуудлаарх хэлэлцээ зарчмын тохиролцоонд хүрснийг TRQ мэдээллээ.

 “Рио Тинто”-гийн зүгээс өнгөрсөн гуравдугаар сард  “Туркойз Хилл Ресурс”-ийн Оюутолгой төсөл дэх 49 хувьд ногдох хувьцааг 2.7 тэрбум ам.доллароор худалдан авах санал гаргаж байсан. “Туркойз Хилл Ресурс”-ийн зүгээс уг үнэлгээг бага байна гэж үзэн,  татгалзсан хариу өгсөн юм. Улмаар өнгөрсөн сарын сүүлээр “Рио Тинто”  саналын дүнгээ өсгөж, нэгж хувьцааны дүнг 40 канад доллар болгосон юм.

Тэгвэл  “Туркойз Хилл Ресурс”-ийн мэдээллээр, тус компанийн ТУЗ-аас байгуулсан, хараат бус  Тусгай хорооны гишүүд “Рио Тинто”-гийн саналыг дэмжсэн шийдвэрт хүрчээ. Ингэхдээ “Рио Тинто”-гийн талтай хэлэлцэж, нэгж хувьцааны үнэлгээг нэмэгдүүлж,  43 канад доллар болгожээ. Тэгснээр 49 хувийн үнэлгээ нь 3.1 тэрбум ам.доллароос 3.3 тэрбум ам.доллар болж нэмэгдэж буй аж. Тэгэхээр “Рио Тинто”-гоос анх санал болгосон үнийн дүн 600 сая ам.доллароор нэмэгдээд байна.

Тусгай хорооноос “Рио Тинто”-той тохиролцсон тохироо нь эцсийн шийдвэр биш.  Энэ оны дөрөвдүгээр улиралд  хувьцаа эзэмшигчдийн ээлжит бус хурлыг товлон хуралдуулж, жижиг хувьцаа эзэмшигчдийн 66.67 хувь нь дэмжвэл, бүрэн баталгаажих юм.