Австралийн кино продюсер ИТЭВОНД амиа алджээ

23 настай Австралийн кино продюсер бүсгүй Итэвонд болсон эмгэнэлт явдлын үеэр нас баржээ.

Тэрээр дэлхийг тойрон аялах төлөвлөгөөтэй байсан. Түүний хамгийн сүүлд оруулсан бичлэгт "Чамайг явах үед юу ч чамтай хамт явахгүй" гэсэн байсан нь энэхүү хар өдрийг зөгнөх мэт гунигт мэдрэмж төрүүлэхээр.

Грэйс Рэйчэд гурван найзын хамтаар Итэвоныг зорьжээ. Алдарт жүжигчин Одри Хепберний дүрд хувирсан тэрээр алдартантай уулзах хүсэлдээ хөтлөгдсөн хүмүүсийн дунд гацаж, амиа алдсан байна. 

Даваа гарагийн өглөө түүний Австрали дахь гэрт ойр дотнынхон нь цугларч, эмгэнэл илэрхийлжээ. Түүний найз "Daily Mail Australia" сонинд өгсөн ярилцлагадаа гэр бүлийнхэн нь энэ явдлыг нууцлахыг хүсэж буй тухай мэдээлжээ. 

Амиа алдахаас хоёр хоногийн өмнө Грэйс Бали арал дээр амарч байв. Найзуудтайгаа усанд сэлж, дугуй унаж, бүжиглэн, коктейль шимж суусан мөчөө тэр хамгийн сүүлийн тик ток дахь бичлэгтээ нийтэлсэн байна.

Өнгөрөгч наймдугаар сард тэрээр өөр нэгэн бичлэгтээ "Чамайг явах үед юу ч чамтай хамт явахгүй. Тиймээс энд байгаа хугацаандаа цагийг сайхан өнгөрүүлээрэй" хэмээн ярьж байсан нь өөрийнхөө үхлийг зөгнөж байсан мэт санагдаж байгаа тухай үзэгчид нь гуниглан ярьжээ. 

Австралийн Боловсролын яамнаас "Кентербери охидын ахлах сургуулийн сурагч асан амиа алдсанд гүнээ харамсан эмгэнэл илэрхийлж байна" хэмээн эмгэнэл илэрхийлсэн бол түүний тик ток хаяг дээр найз нөхөд болон дотнын хүмүүс нь чин сэтгэлийн хүндэтгэлийн үгсээр түүнийг сүүлийн замд нь үдэж байна.