Төсвийн хөрөнгөөр баригдсан барилгуудын эдийн засгийн үр ашгийг эргэн дүгнэхийг зөвлөв

Ирэх оны нэгдсэн төсвийн тухай хуулийг УИХ энэ сарын 15-нд багтаан хуульчлан, батална. Төсвийн төслийг боловсруулан, өргөн барьсан Засгийн газар, Сангийн яамны зүгээс хэмнэлтийн бодлогыг чухалчилж, үр ашиггүй хөрөнгө оруулалтын зардлуудыг аль болох хумихад чиглэсэн төсөл болсон гэж тодотгож байгаа юм.

Харин хөндлөнгийн шинжээчид, эдийн засагчдын зүгээс төсвийн төсөлтэй холбоотой шүүмж бүхий байр сууриудыг илэрхийлсээр байна. Тухайлбал, 2023 оны төсвийн хөрөнгө оруулалтын төлөвлөлтийг оновчтой болгох шаардлагатай байгааг Нээлттэй нийгэм форумын дэргэдэх Төсвийн зөвлөлөөс сануулж байна.

“Ирэх оны тухайд шинээр хөрөнгө оруулалтын төслийг эхлүүлэхгүй гэдэг нь зөв шийдвэр. Гэвч өнгөрсөн жилүүдэд хөрөнгө оруулалтын объектыг сонгохдоо улс төрийн ач холбогдол, сонгуулийн тойргийг харж сонголт хийснээс бус нийгэм, эдийн засгийн үр ашгийг зөв тооцоолж байгаагүй нь хөрөнгө оруулалтын бодлогыг томоохон алдаанд хүргэсэн. Төсвийн хөрөнгө оруулалтын төлөвлөлтийг сайжруулах чиглэлээр дараах арга хэмжээг санал болгож байна. Үүнд:

• Аль салбарт, ямар үйл ажиллагааг төр цаашид санхүүжүүлэхгүй вэ гэдгийг шийдэх;

• Улсын төсвийн хөрөнгө оруулалтаар баригдсан барилга, объектуудын эдийн засгийн үр ашиг, ашиглалтын байдлыг эргэн дүгнэж үзэх;

• Чанар муутай барилга, объект барьж, хүлээн авч байгаагийн улмаас улсын төсвийн хөрөнгийг дахин дахин зарцуулах, үр ашиггүй зарцуулах нэг нөхцөл болж байна. Иймд чанар, стандартыг цоо шинээр мөрдүүлэх хэрэгтэйг зөвлөлөө.