Арагчи: Хаменеийг хөнөөсөн нь олон улсын эрх зүйн зарчимд халдсан хэрэг

Ираны дээд удирдагч Али Хаменеийг хөнөөсөн нь Израил, АНУ-ын зүгээс олон улсын эрх зүйн үндсэн зарчим шууд халдсан хэрэг юм гэж Ираны гадаад хэргийн сайд Аббас Арагчи НҮБ-ын ерөнхий нарийн бичгийн дарга Антонио Гутерриш болон НҮБ-ын Аюулгүйн зөвлөлийн гишүүн орнуудад хаягласан захидалдаа онцолжээ.

“АНУ болон Израилын дэглэм НҮБ-ын тусгаар гишүүн орон болох улсын дээд удирдлагыг санаатайгаар бай болгон сонгосон. Энэхүү хулчгар террорист ажиллагаа нь олон улсын эрх зүйн суурь зарчимд шууд халдсан хэрэг юм” гэж Арагчи мэдэгдсэн байна.

Тэрбээр мөн Ираны дээд удирдагчийг устгахад чиглэсэн АНУ, Израилын үйлдэл нь олон улсын террорист ажиллагаа бөгөөд хүн төрөлхтний эсрэг гэмт хэрэг гээд АНУ-ын Ерөнхийлөгч, Израилын ерөнхий сайд болон ажиллагааг төлөвлөсөн, тушаал өгсөн бүх этгээдүүд эрүүгийн хариуцлага үүрэх ёстой гэж онцолжээ.