О.Магнай: Одоохондоо намайг дарамтлаагүй, Бурхан өршөөг

Циркийн асуудлаар О.Магнай мэдээлэл хийлээ. Тэрээр сэтгүүлчдэд ийм мэдээллийг өгсөн юм.

“Өнгөрсөн долоо хоногт Циркийн хувь эзэмшигчид нэлээдгүй буруу ташаа мэдээлэл хийлээ. Үүнийг залруулахаар би  мэдээлэл хийж байна. Циркт менежментийн хувьчлал хийгдсэн. Менежментийн хувьчлал гэдэг нь юу дуртайгаа хийж болно гэсэн үг биш. Худалдагч болон худалдан авагчид үйл ажиллагааныхаа  чиглэлийг өөрчлөхгүйгээр зориулалтын дагуу ажиллах, ажиллуулах нөхцөлтэйг зааж харилцан тохиролцож, байгуулсан хүчин төгөлдөр гэрээ. Өөрөөр хэлбэл энэ нь сонгон шалгаруулаагүй дуудлага худалдаанд оруулаагүй. Төрөөс илүү сайн менежментээр тухайн чиглэлийг үргэлжлүүлж,  авч явна гэсэн харилцан тохиролцоонд худалдагдсан. Одоо энэ гэрээг зөрчөөд циркийг цирк гэдэг утгаар нь ашиглахгүй байна.

-Циркийн удирдлагуудын зүгээс энэ гэрээний хугацаа дууссан гэж байсан?

-Эхлээд менежментийн гэрээгээр “Аса групп”-т шилжүүлэн, ажиллуулж үзээд болох юм байна гэдэг үүднээс худалдах, худалдан авах гэрээгээр худалдсан. Яг өнөөдрийн байдлаар Циркийн 6 хэсгээс нэг л хэсгийг зориулалтаар нь ашиглаж байна. Бусдыг нь зориулалтын бусаар буюу худалдаа үйлчилгээний чиглэлээр ашиглаж байна. “Аса групп” улсын циркийг хувьчилж авахдаа хөгжүүлнэ гэсэн стратегийг баталж авсан. Тоглолт хийх хувиар нь мартын 8-аар 1-2 удаа, валентинаар 1, цэргийн баяр, хүүхдийн баяр, улсын баяр, хичээлийн шинэ жил, Улс тунхагласны баяр болон 6 сарын нэгнээс 9 дүгээр сарын 17 хүртэл нийтдээ 64-99 хүртлэх тоглолт хийнэ гэж үүрэг хүлээсэн. Харамсалтай нь энэ үүргээ биелүүлээгүй.

-Д.Дагвадорж мэдээлэл хийхдээ цирк тоглодог гэж байсан?

-Нэг концертонд гурван хүнээр жонглер эргүүлүүлчихээд тэрийгээ “Бид өнөөдөр цирк хийсэн” гээд байна. Ард түмнийг хуурч болохгүй. Хууль хүн болгонд үйлчлэх хэрэгтэй. Мөнгөтэй, хүчтэй байж болно. Гэхдээ айлгаж чадахгүй. Хууль хүн болгонд тэгш үйлчилнэ.

-Циркд тийм олон амьтан байсан юм уу?

-Улсын нийгмийн даатгалын ерөнхий газраас “Аса цирк”-д өнөөдөр хэдэн хүн ажиллаж байгаа талаарх мэдээллийг авсан. Жил ирэх бүр ажилчдын тоо буурч 2014 онд 62 ажилчинтай байна. Амьтад хөгшрөөд үхэлгүй яахав дээ гэж байгаа юм. Тэгээд хөгшрөөд үхчихдэг юм бол бүх албан газрын ажилчид хөгшрөөд үхэж дуусаад одоо хүнгүй байгаа ш дээ. Үүнийг шинэчилж, дахиад амьтан авах ёстой энэ нь гэрээгээр хүлээсэн үүрэг. Сарлаг, асгат сарлаг, ганган хул морь, сармагчин, ямаа чоно нохой, бамбарууш, гүү, унага, тэмээ, үнэг, бамбарууш, бэлтрэг зэрэг нийт 42 амьтан хүлээлгэж өгсөн.  Хаачсан гэхээр үхчихсэн гэдэг. Тэр хариулт бишээ. Энэ байдлаас хараад байхад хууль үйлчилдэггүй хэсэг бүлэг хүмүүс байна. Тэр хүмүүст жаахан хууль үйлчлээсэй. Бид бүгдээрээ нэг хуулийн дор амьдарч байгаа. Хууль хэрэгждэг монгол болсон гэдгийг сануулмаар байна.

-Танайхаас явуулсан бичиг алдаатай байсан гэсэн?

-Албан бичиг дээр манай ажилчин хариуцлага алдаад 2014 оныг 2012 он гэж бичсэн байсан. Манайх ажилтандаа хариуцлага тооцсон.

-Яг ийм зөрчилтэй байгууллагууд илэрсэн үү?

3-4 газар бий. Гэхдээ өнөөдөр нийтэд зарлахгүй. Байгуллаын нэр хүндтэй холбоотой учраас зарим нь алдаагаа засаад үйл ажиллагаагаа жигдрүүлсэн. Бүгдийг нь шалгаж байна. Нэгийг нь онилоод нөгөөх нь онилохгүй явуулдаг юм гэж байхгүй. Энэ нь хэн нэг даргын өмч биш. Монголын ард түмний өмч хувьчилсан асуудал.

- Таныг сонгуулийн ажлаа хийж байна гэж байгаа. Үүн дээр ямар тайлбар өгөх вэ?

- Би 2008 онд Сонгинохайрхан дүүрэгт нэр дэвшиж байсан. Гэхдээ цирк ярихаар сонгууль ярьж болохгүй.  Циркээ л ярих ёстой ш дээ.

-Та сая ярихдаа мөнгө, хүчээр айлгаж чадахгүй гэлээ. Таныг дарамталж, айлгасан юм уу?

 -Дарамталсан юм одоохондоо гараагүй байна. Бурхан өршөөг.

-Д.Дагвадорж өөртэй чинь холбогдсон уу?

-Үгүй

- Есөн сарын дараагаас циркийг буцааж авах асуудал яригдах уу?

- Төрийн бодлого бол буцааж авах биш. Үйл ажиллагааг нь засч залруулаад сайжруулах. Бид есөн сарын хугацаа өгсөн болохоор үйл ажиллагааг нь жигдрүүлэх боломж “Аса групп” бий. 1.5 тэрбум төгрөгөөр хувчилсан юм байна лээ. Яг шүүхээр ороод буцааж авъя гэвэл шүүхийн нэхэмжлэлийг ССАЖЯ гаргана.

 Н.Ганаа