ӨНӨӨДӨР: Дэлхийн хэвлэлийн эрх чөлөөний өдөр

2019 оны 05 сарын 03

НҮБ-ын Ерөнхий Ассамблейн шийдвэрээр 1993 онд жил бүрийн тавдугаар сарын 3-ны өдрийг Дэлхийн хэвлэлийн эрх чөлөөний өдөр болгон тэмдэглэх шийдвэр гаргасан билээ.

Дэлхийн хэвлэлийн эрх чөлөөний өдрийг тэмдэглэх санаачилгыг Африкийн төлөөлөгчид анх гаргасан. Тавдугаар сарын 3-ны өдрийг ч тохиолдлоор сонгоогүй. 1991 оны энэ өдөр Намибийн нийслэл Виндхук хотод Африкийн орнуудын чөлөөт хэвлэлийн төлөөлөгчид чуулж, дэлхийн улс орнуудад хэвлэлийн эрх чөлөөг хангахыг уриалж байжээ.

Энэ өдрийг тохиолдуулан, НҮБ-ын Ерөнхий нарийн бичгийн дарга илгээлт гаргадаг бөгөөд 2019 онд энэ өдрийг  “Ардчиллын төлөө хэвлэл мэдээлэл-Хуурамч мэдээллийн эрин үе дэх сонгууль ба сэтгүүл зүй” сэдвээр тэмдэглэж байна.

НҮБ-ын Ерөнхий нарийн бичгийн дарга Антониу Гутерриш “Жирийн ард иргэд нийгмийн амьдралд оролцох боломж дэлхий дахинд багассаар байгаа нь түгшүүр төрүүлж байна. Хэвлэл мэдээллийн хэрэгсэл, сэтгүүлчдийн эсрэг хандсан сөрөг үйл ажиллагаа хүчээ авч, сэтгүүлчид, ялангуяа эмэгтэй сэтгүүлчид мөрдлөгө, хүчирхийлэлд өртөх явдал ихэслээ. Хэвлэлийн эрх чөлөөгүйгээр үнэнч шударга нийгэм байгуулж, үнэн зөвийг засгийн эрхэнд байгаа хүмүүст хүргэх боломжгүй билээ”

ЮНЕСКО-гийн тооцоогоор 1994 оноос 2018 оны хооронд дэлхийд 1307 сэтгүүлч алагдсаны 99 нь 2018 онд амь насаа алджээ.

ЮНЕСКО-гийн Ерөнхий захирал Азуле “Сэтгүүлчдийн эсрэг гэмт хэрэг үйлдэгчид ямар ч ял шийтгэлгүй өнгөрч байгаа нь нийгмийн гол аюул болон хувирлаа. Бид анхааралтай байж, хамтдаа хэвлэлийн эрх чөлөөний төлөө тэмцэх ёстой. Бид сэтгүүлчдийн аюулгүй байдлыг хамгаалах шаардлагатай байна. Сэтгүүл зүйн салбарт дайсагнал, эрүүл бус өрсөлдөөн гарснаар хэвлэл, сэтгүүлчдэд үл итгэх байдал нэмэгдэж байна. Ийм үед үг хэлэх эрх чөлөөг хамгаалж, бодит баримт дээр тулгуурласан мэдээллийг чөлөөтэй солилцох боломжийг хангах ёстой”

Өнөөдөр Этиопийн Аддис-Абеба хотод “Хэвлэл мэдээлэл ардчилалын төлөө: сэтгүүл зүй болон сонгууль хуурмаг мэдээллийн эрин үед” сэдэвтэй олон улсын бага хурал болж байна. Мөн НҮБ-ын төв байранд албан ёсны арга хэмжээ зохион байгуулагдаж, НҮБ, ЮНЕСКО-гийн удирдлагууд оролцох юм.

Энэ үеэр Гильермо Каногийн нэрэмжит шагнал гардуулах ёслол болно. Кано бол Колумбын хар тамхины мафи, улстөрчидтэй ямар холбоотойг илчилсэн нийтлэлийнхээ төлөө 1986 онд алуулсан сэтгүүлч юм. Түүний нэрэмжит шагнал 25 мянган ам.доллар бөгөөд тухайн жилд хэвлэлийн эрх чөлөөний төлөө тэмцэлд хамгийн их гавьяа байгуулсан хувь хүн, албан байгууллагад олгодог.

Энэ жилийн шагналыг Мьянмарын сэтгүүлч  Ко Ва Лону (Ko Wa Lone), Ко Кья Со Оо (Ko Kyaw Soe Oo) нарт олгожээ. Тэднийг 2017 оны 12 дугаар сард Янгонд баривчилж, улсын нууц задалсан хэргээр шүүхээс долоон жилийн ял оноосон юм.

Сэтгэгдэл ( 0 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top