ӨГЛӨӨНИЙ МЭНД!

Өнөөдөр 2023.09.21. Билгийн тооллын 6. Монгол эх оронд маань нар 06 цаг 37 минутад мандлаа, 18 цаг 54 минутад жаргана.

Улаанбаатар хотод үүлэрхэг. Өдөртөө 17 хэм, шөнөдөө -1 хэм. Та хувцсаа тохируулж өмсөөд гараарай.

Өнөөдөр Олон улсын энх тайвны өдөр. Улс орнуудаас Польшид Гаалийн өдөр, Армен, Мальтад Тусгаар тогтнолын, Боливд Оюутны өдөр.

Энэ өдөр Францын зохиолч Фредерик Бегбедер, Бразилын жүжигчин Ингра Либерату, Америкийн жүжигчин Рики Лейк, Мэгги Грейс, Мексикийн хөлбөмбөгч Родриго Годинез, Оросын уран сайхны сэлэлтийн тамирчин, олимпын таван удаагийн аварга Светлана Ромашина зэрэг алдартан төрсөн өдрөө тэмдэглэж байна.

Энэ өдөр дэлхий дахинд болсон онцлох үйл явдлууд:

1920 оны энэ өдөр Украинд сургуулиудад украин хэл зааж эхэлжээ.

1964 оны энэ өдөр Мальта Их Британиас тусгаар тогтножээ.

1981 оны энэ өдөр Белиз Их Британиас тусгаар тогтнов.

1991 оны энэ өдөр Арменид бүх нийтийн санал хураалт болж, сонгогчдын 99 хувь нь тусгаар тогтноно гэжээ.

1999 оны энэ өдөр Тайваньд газар хөдлөлт болж, 2000 гаруй хүн амиа алджээ.

2003 оны энэ өдөр Бархасвадь руу хөөрсөн Galileo сансрын хөлгийн үйл ажиллагааг зогсоосон байна.

Өнөөдөр үс засуулвал сайн, өнгө зүс сайжирна.

Эл өдөр бар жилтнээ аливаа үйлийг хийхэд эерэг сайн бол үхэр, луу, хонь, нохой жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй.

Эл өдөр хууль цааз гаргах, батлах, хэрэглэх, хулгай дээрмийг номхотгох, гэмтнийг шийтгэх, мал адгуус номхруулах, лусыг тахих, андгай тангараг, гэрээ хэлцлээ буцахадд сайн. Харин гэр бүрэх, хэрүүл тэмцэл хийх, сэтгэлд сэвтэй газар очих, хүүхэд хөлд оруулахад муу.

Өдрийн сайн цаг нь хулгана, үхэр, туулай, морь, бич, тахиа.

Хол газар явах бол баруун урагш мөрөө гаргаад аян замдаа гараарай.

Өнөөдрийн ажилд тань амжилт хүсье.