Х.Бадамсүрэн: Дорнодын иргэд бүтээгдэхүүн хуваах гэрээг шинэчлэхийг хүсэж байна

Монгол Улсын Ерөнхий сайд У.Хүрэлсүх “Аймаг нийслэлийн Иргэдийн төлөөлөгчдийн хурлын дарга, Засаг дарга нарын зөвлөгөөн”-д оролцож, Засгийн газрын үйл ажиллагааны төлөвлөгөөний биелэлтийг товч танилцуулж, зарим үүрэг даалгаврыг өглөө. Энэ үеэр аймгуудын Засаг дарга нар орон нутгийнхаа байдлыг танилцуулсан юм.

Дорнод аймгийн Засаг дарга Х.Бадамсүрэн: Зүүн аймгуудад газрын тосны томоохон талбайнууд байдаг. Дорнодчууд одоо үйл ажиллагаа явуулж байгаа 19, 21 дүгээр талбайн олборлолтоос орон нутгийн хөгжилд дэмжлэг үзүүлэх ёстой гэж үзэж байгаа. Нутгийн иргэд газрын тос олборлогч компанитай хийсэн бүтээгдэхүүн хуваах гэрээг шинэчлэх шаардлагатай гэж үзэж байна. Ард иргэд газрын тосны олборлолтоос үүссэн байгаль орчин, хүн ардад учирч буй сөрөг нөлөөллийг арилгахын тулд тухайн нутагт зориулж хөрөнгө тусгах ёстой гэж шаарддаг. Байгалийн нөөц ашигласны төлбөрөөс олон улсын жишгийн дагуу 30 хувийг нь орон нутгийн хөгжилд зарцуулахыг иргэд хүсэж байна. Газрын тосны тухай хуульд тухайн орон нутгийн хөгжлийн нэгдсэн сан гээд оруулсан. Энэ нь Сангийн яам болон орон нутгийн хооронд маргаантай байдал үүсгэдэг. Газрын тос олборлолтын 21 дүгээр талбайд роялти тооцдог. Үүнийг орон нутагт хуваарилах юм бол Халхгол сум болон Дорнод аймагт жилдээ 10 гаруй тэрбум төгрөг хуваарилагдах боломжтой. Энэ нь тухайн орон нутгийг дэмжсэн том дэмжлэг болж чадна. Миний бие Засаг даргаар ажиллаж эхэлснээс хойш энэ асуудлаар Засгийн газарт удаа дараа хандаж байгаа. Үүнийг Уул уурхайн яам хүлээн зөвшөөрч байгаа.