Шойгу монгол дайчдыг Ялалтын парадад оролцохыг урилаа

ОХУ-ын БХЯ-ны сайд Сергей Шойгу Монгол Улсын Батлан хамгаалахын сайд Нямаагийн Энхболдыг аугаа их Эх орны дайны 75 жилийн ойн баярт зориулсан цэргийн жагсаалд оролцохыг урьжээ.
 

Шойгу “Харамсалтай нь, цар тахлын улмаас бид Улаан талбайд болох байсан цэргийн жагсаалаа хойшлуулахаас өөр аргагүй боллоо. Коронавигрусний халдвар намжсаны дараа төлөвлөж байсан 75 жилийн ойн арга хэмжээгээ бүгдийг энэ оны сүүл хүртэл зохион байгуулах болно. Эрхэм сайд таныг өөрийн биеэр оролцохоос гадна цэрэг дайчдаа илгээнэ гэдэгт итгэж байна. Манай хоёр орон олон жилийн найрамдалт харилцаатай билээ” гэж Н.Энхболд сайдтай хийсэн видео уулзалтын үеэр онцолжээ.

Цэргийн жагсаалд “Хувьсгалт Монгол” гэсэн бичигтэй Т-34 танк оролцох аж.

Шойгу “Гитлерийн Герман манай улсад халдан довтолсны дараа хамгийн түрүүнд Монгол Улс бидэнд тусалсан. Нийт 500 мянган хүлэг морь илгээснээс гадна монголчуудын хандиваар 53 танктай “Хувьсгалт Монгол” танкийн бригад байгуулж байлаа. Энэ бригад Берлинийг чөлөөлөхөд оролцсон. Мөн “Монгол ард” нисэх эскадриль чухал үүрэг гүйцэтгэсэн” гэж мэдэгдсэн байна.