Монгол Улсын заавал төлөх ёстой ӨР ТӨЛБӨРҮҮД

2020 оны улсын төсөвт ээлжит бус чуулганаар тодотгол хийсэн. Төсөвт тодотгол хийхгүй гэсэн байр сууриа удаа дараа хамгаалж байсан Сангийн сайд Ч.Хүрэлбаатар энэ удаад тодотгосон төсвөө хамгаалсан байр суурийг мөн илэрхийлж байгаа юм.

Тэрбээр 2020 онд 2 их наяд төгрөгөөр ӨР дарах нь төсвийн тодотголын ОНЦЛОГ гэж мэдэгдсэн байна. Сангийн сайдын хэлээд буй хөнгөлөлттэй зээлийн төлбөрүүд, бондын хүүгийн төлбөрүүд нь төлөх ёстой  хугацаа нь болсон учраас заавал хийгдэх ёстой төлбөрүүд гэдгийг САНУУЛЪЯ.

Бондын төлбөр:

• 2012.12.05-нд гаргасан “Чингис” бондын хүүгийн төлбөр 145.3 тэрбум төгрөг;
• 2016.03.15-нд авсан Кредит Свисс банкны зээлийн төлбөр 304.4 тэрбум төг;
• 2016.04.06-нд гаргасан “Мазаалай” бондын хүүгийн төлбөр 153.3 тэрбум төг;
• 2017.03.09-нд гаргасан “Хуралдай” бондын хүүгийн төлбөр 147.7 тэрбум төгрөг;
• 2017.10.26-нд гаргасан “Гэрэгэ” бондын хүүгийн төлбөр 127.2 тэрбум төгрөг;

 Хөнгөлттэй зээлийн төлбөр:

• 1991 оноос хойш авсан нийт 270 гадаад хөнгөлөлттэй зээлийн төлбөрт 639.0 тэрбум төгрөг төлнө:
•  АХБ-ны 60 зээлийн төлбөр 272.3 тэрбум төгрөг;
•  Дэлхийн банкны 46 зээлийн төлбөр 72.7 тэрбум төгрөг;
•  Япон Улсын 23 зээлийн төлбөр 121.6 тэрбум төгрөг;
•  БНХАУ-ын 23 зээлийн төлбөр 85.3 тэрбум төгрөг.

 Дотоод үнэт цаасны төлбөр:

• Дотоод үнэт цаасны үндсэн болон хүүгийн төлбөр 420.1 тэрбум төгрөг төлнө.

Сануулахад, Төсвийн тодотголд нэгдсэн төсвийн тэнцвэржүүлсэн нийт орлого, нийт зарлага, төсвийн тэнцэл зэрэг эдийн засгийн үндсэн үзүүлэлтийг Засгийн газрын өргөн мэдүүлснээс өөрчлөлгүйгээр нийт тэнцвэржүүлсэн орлогын 9 их наяд 730.9 тэрбум төгрөг буюу ДНБ-ий 25.2 хувь, нийт зарлагыг 14 их наяд 577.5 тэрбум төгрөг буюу ДНБ-ий 37.7 хувь, нэгдсэн төсвийн нийт тэнцвэржүүлсэн тэнцлийн алдагдал 4 их наяд 846.6 тэрбум төгрөг буюу ДНБ-ий 12.5 хувьтай тэнцүү байхаар тооцсон байна.