Улаанбаатарчууд үнэндээ аз жаргалтай юу?

Тухайн үеийн нийслэлийн Засаг дарга бөгөөд Улаанбаатар хотын захирагчийн санаачилгаар 2016-2020 он хүртэл “Аз жаргалтай хот” хөтөлбөрийг хэрэгжүүлж, улаанбаатарчуудыг аз жаргалтай болгох төлөвлөгөөг танилцуулж байв. Гэтэл өнөөдөр Улаанбаатар хотод шийдэгдсэн асуудал тун бага. Хэдхэн жилийн өмнө "утаа" гэх толгойны өвчинтэй байсан бидний өмнө одоо “түгжрэл” гэх бухимдах шалтгаан ужгирчээ. 4,704.4 ам.дөрвөлжин метр талбайтай хот дотроо амьдарч байж өдөрт 3-4 цагийг лавтайяа түгжирч өнгөрөөдөг хүмүүс олон мянгаараа манай хотод амьдардаг.

“Иргэд нийслэлийн авто замын түгжрэлд өдөрт дунджаар 2.5 цаг, жилд бүтэн 35 өдрийг өнгөрөөдөг, энэ цаг хугацаанд алдсан боломжийн өртөг 2.7 их наяд төгрөг. Байдал энэ хэвээр үргэлжилбэл алдсан боломжийн өртөг дөрөвхөн жилийн дараа 24 их наядад хүрнэ” гэхчлэн төрөл төрлөөр нь судалгаа хүртэл гаргасан. Арга ядаж жилд 420 тэрбум төгрөгөөр түгжрэлийг цогцоор нь буулгана гэх. Өмнө нь бол жилд 30-50 тэрбум төгрөгийг түгжрэлд зарцуулж байв. Хөрөнгө мөнгө зарцуулаад зарцуулаад хэрэгжсэн зөв зохицуулалт өнөөдөр байхгүй. Түгжрэл багахан ч буураагүй.

Улаанбаатар хотынхоо хамгийн гол баялаг, үнэт зүйл болсон иргэнийхээ ажиллахад, амьдрахад, сурч хөгжихөд, эрүүл мэндийн яаралтай тусламж үйлчилгээ авахад хүртэл дайсагнах түгжрэлийг цаг алдалгүй шийдэх ёстой. Түгжрэл хүний амьдралын хамгийн чухал цагуудыг, гэр бүлдээ зарцуулах өдөр хоногуудыг хулгайлж Монгол хүнийг аз жаргалгүй болгож байгаа нийгмийн дайсан болсон шүү дээ. Төрийн бодлого, боломжит шийдэл бүхнээрээ 2022 ондоо төсөвлөсөн 420 тэрбум төгрөгөө үр ашигтай л зарцуулаасай.