В.Путин: Орос дайныг хүсдэггүй

ОХУ-ын Ерөнхийлөгч Владимир Путин, Германы Канцлер Олаф Шольц нар Кремльд уулзав. Уулзалт гурав гаруй цаг үргэлжилжээ.

В.Путин Орос улс дайныг хүсдэггүй. Тиймдээ ч Москва бүх талын аюулгүй байдлыг тэгш хангах талаар яриа хэлэлцээ хийх санал тавьсан гээд цагтаа НАТО Югославын эсрэг дайн хийж байсныг сануулжээ. Энэ бол муу жишээ хэдий ч болсон явдал гэж онцолсон байна.

Шольц тухайн үед Умард Атлантын эвсэл тус улсад геноцид буюу хоморголон устгах явдал гарахаас сэргийлэхийг зорьсон гэж тайлбарлажээ. Үүний хариуд В.Путин Донбасст яг ийм явдал гарч байна. Энэ бол геноцид гэв.

Москвагийн зүгээс аюулгүй байдлын асуудлыг дипломат арга замаар шийдвэрлэхийг эрмэлзэхийн сацуу АНУ, НАТО-гийн дэвшүүлсэн санаачилгуудыг хэлэлцэхэд бэлэн байна. Ингэхдээ Киев ойрын үед НАТО-д элсэхгүй гэж итгүүлэх нь Орос улсад хангалтгүй гэж Путин онцолжээ.

Германы Канцлер аюулгүй байдлын баталгааны асуудал дээр талуудын байр суурь өөр өөр байгаа ч Өрнөд Оросын саналд хариу өгч, Орос нь эл хариу саналд эерэг заалт олж харсан нь сайн зүйл. Түүнчлэн Оросын цэргүүд байнгын байрлалдаа буцаж эхэлсэн нь сайны тэмдэг хэмээн онцолжээ.

Орос улс юуны өмнө Герман, Франц зэрэг улс орнууд Киевт Минскийн хэлэлцээрийг хэрэгжүүлэх тал дээр зохих нөлөө үзүүлнэ гэж найдаж байна гэж Путин илэрхийлэв.

Шольцын хэлснээр, Минскийн хэлэлцээрийг бүх тал, тэр дундаа ОХУ, Украин баримтлах учиртай. Харин Донецк, Луганскийн тусгаар тогтнолыг хүлээн зөвшөөрөх нь “улс төрийн гамшиг” байх болно.

“Умардын урсгал-2” хийн хоолойн тал дээр Путин “Умардын урсгал-2” нь цэвэр арилжааны төсөл гээд германчууд энэ төслийг дэмжсэн, урт хугацааны гэрээний дагуу Оросоос хямд үнэтэй хий авч байгаагийн төлөө Германы Канцлер асан Герхард Шрёдерт талархах учиртай гэж онцолжээ.

Орос улс Украинд довтолсон тохиолдолд Оросын эсрэг тавих хориг арга хэмжээнд “Умардын урсгал-2” төсөл орж байгаа эсэх талаар асуултад хариу өгөхөөс зайлсхийсэн байна.