Мэрлин Монрогийн даашинзыг СҮЙТГЭСЭН Ким Кардашъяан ХАТУУ шүүмжлэлд өртөв

Реалити шоуны од Ким Кардашъяан өнгөрөгч тавдугаар сард болсон "Met Gala" шагнал гардуулах ёслолын улаан хивснээ домогт Мэрлин Монрогийн өмсөж байсан гоёмсог даашинзтай ирж олныг шуугиулсан. Тус даашинзыг өмсөхийн тулд их хэмжээний жин хаясан тэрээр хатуу шүүмжлэлд өртжээ. 

Мэрлин Монрогийн эд зүйлсийг цуглуулдаг Скотт Фортнер Кимийг Монрогийн даашинзанд их хэмжээний хохирол учруулсан тухай мэдээлжээ. Тус даашинз Кимийг хэчнээн жин хассан ч таарахгүй байсан учир материалд нь өөрчлөлт орж суналт үүссэн байсан гэнэ. Мөн зарим шигтгээ нь унаж, оёдол нь суларсан, мөн нэмэлт оруулга оруулсан зэргээр их хэмжээний элэгдэлд орсон байсан тухай ярьжээ. 

Тус даашинзыг хадгалан үлдээхийн тулд их хэмжээний хүчин чармайлт гарсан тухай тэрээр онцлон тэмдэглэжээ. Олон улсын музейн зөвлөлөөс "Түүхэн хувцсыг хэн ч байсан өмсөж болохгүй. Тус хувцас хувийн цуглуулагчдын өмч байсан ч болохгүй. Энэ бол хүн төрөлхтний хувьд өв" хэмээх тайлбарыг хийсэн. 

Уг даашинзыг 2016 оноос хойш тусгай температуртай орчинд хадгалж байсан бөгөөд Монрогоос хойш хэн ч өмсөөгүй байсан ажээ. 

Ким Кардашъяан тус даашинзыг өмсөхийн тулд ихээхэн хүчин чармайлт гаргасан. Сар гаруйн хугацаанд зөвхөн ногоо идэж, гүйлтийн зам дээр олон цагийг өнгөрөөж, өдөрт хоёр удаа хөлөргөдөг хувцас өмсөж байсан гэнэ. Түүний энэхүү дэглэм нь олон хүний шүүмжлэлд өртсөн. Ийнхүү жингээ хассан ч даашинзны цахилгаан татагдахгүй байсан учир гадуураа үслэг хүрэм нөмөрсөн аж. 

Зарим хүмүүс түүнийг нас барсан эмэгтэйн даашинзыг өмсөх гэсэн ханашгүй хүсэл нь даашинз болон өөрийг нь сүйтгэсэн хэмээн шүүмжилж эхэлжээ.