ЗАВХАН: МСҮТ-ийн захирал Б.Гэрэлт-Од олон нийтийн амь насанд "ЗАНАЛХИЙЛЖ" байна

Завхан аймгийн Тосон цэнгэл сумын Мэргэжил сургалт үйлдвэрлэлийн төвийн /МСҮТ/ оюутнууд, багш ажилчдын амь нас эрсдэлд ороод байна. Учир нь тус төвийн дотуур байр, оюутнуудын хүнс хадгалах хөргөгчинд олон тооны тарваганы түүхий тулам хадгалагдаж байгаа юм.

Эдгээр туламнууд нь  МСҮТ-ийн захирал Б.Гэрэлт-Одынх гэх бөгөөд тэрбээр албаны автомашинаар хориотой ан хийж, тарвагаа оюутнуудын хүнстэй хамт хадгалж байгаа нь хүүхдийн эрүүл аюулгүй орчинд суралцах эрх болон, эрүүл ахуйн болон шаардлага стандартыг зөрчиж байна.

Завхан аймаг бол тарваган тахлын байгалийн голомтот бүс бөгөөд тахлын халдвар өндөр идэвхтэй явагдаж байгаа энэ үед хүн амын эрүүл мэндэд онц ноцтойгоор заналхийлж буй Б.Гэрэлт-Одын үйлдлийг багш, ажилчид эсэргүүцэж, цагдаагийн байгууллагад ханджээ.

Түүний энэ хэргийг Тосонцэнгэл сумын цагдаагийн газраас шалгаж байгаа ч энэ хэргийг жижиг зөрчлийн хэрэг болгон хаалгаж, олон нийтэд мэдээлэхгүй өнгөрөөхөөр хөөцөлдөж эхэлсэн тухай эх сурвалжийн мэдээлэл байна.

Дашрамд дурдахад, Б.Гэрэлт-Од гэгч нь өмнө нь тус төвийн менежерээр ажиллаж байхдаа өөр дээрээ хуурамч тушаал гарган нэмэгдэл цалин авч байсан баримт бий гэх. Харин захирал болсноосоо хойш ажилчдыг үндэслэлгүй халж эхэлсэн бөгөөд тэтгэврийн насанд хүрээгүй багш нарыг "ажлаас хална" хэмээн дарамталж эхэлжээ.

Түүний хууль бус үйлдлүүд, боловсон хүчний тогтворгүй байдлаас болоод Тосонцэнгэл МСҮТ-д суралцах оюутны тоо эрс буурч одоогоор 70 оюутан сурагчтай байгаа ч Боловсрол, шинжлэх ухааны яам болон холбогдох албаны хүмүүст суралцагчдын тоог нэмэгдүүлэн мэдээлж байгаа нь боловсролын байгууллагын ёс зүй зарчмын хувьд байж болохгүй алдаа юм.

Тиймээс дээрх асуудалтай холбоотойгоор Боловсрол шинжлэх ухааны яаманд хандсан боловч одоогоор тодорхой хариу ирээгүй байна. Харин санал шүүмж гаргасан олон багш ажилтан түүний  дарамт шахалт дор байгааг холбогдох албаныхан анхааралдаа авч, олон нийтийн эрх, ашиг эрүүл мэндийг хамгаалах шаардлага бий болжээ.