Хог дээр хаягдсан тэрбумын хашаа

Авто замын нэгдүгээр эгнээг хашаалсан төмөр хашааг бөөнөөр нь төмрийн хаягдал дээр хаясан нэгэн зураг сошиал орчинд явж байна.

Гэтэл Яармагийн замд суурилуулсан уг хашааны шаардлагагүй хэсгийг нь мөн хуулж авч байгаа гэж албаны хүн мэдэгдсэн мэдээлэл ч явав. Энэ орчмын хашааг бараг машинтай болгон нь очиж мөргөөд юу ч биш болгосон юм гэсэн. Тэгвэл уг хашааг 950 сая төгрөгөөр тендергүй худалдаж аваад 200 сая төгрөгөөр суурилуулсан аж. Гэтэл өдгөө “Шаардлагагүй хэсэг”-ийг нь хуулж аваад зогсож байх. Яасан ч их мөнгөөр шаардлагатай үгүйг нь мэддэг юм. Ёстой л нөгөө төсвийн мөнгө уйлдаггүй гэдэг л болж байна. Уг нь тэрбум гаруй төгрөг гэдэг хэрэгтэй зүйлд нь зарцуулбал бага хөрөнгө огт биш. Гэтэл эрх мэдэлтэн, дарга нар ямар ч төлөвлөгөө, стандартгүй барьж орхичихоод дараа нь “Шаардлагагүй” байжээ гэсэн шүү юм яриад хуулаад зогсож байдаг.

Мэдээж үүний цаана өнөөх л олон жил бугшсан авлига, хулгай луйврын асуудал байж мэднэ. Засгийн газраас энэ асуудлыг шийдүүлэхээр ХЗДХ-ийн сайдаар ажиллаж байсан Х.Нямбаатарыг нийслэл рүү илгээсэн. Тэр ч өөрөө энэ асуудлыг цэгцэлнэ гэж амласан. Харин түүний цэгцлэх, учрыг нь олж, хариуцсан нөхдүүдэд нь хариуцлага тооцох ийм нэгэн асуудал нэмэгдлээ.