Ким Жон Ун: “Хвасон-18” пуужин АНУ-д ямар хариу барихыг харуулсан

Тив алгасах “Хвасон-18” баллистик пуужинг амжилттай хөөргөсөн нь АНУ Пёньяны эсрэг буруу шийдвэр гаргавал БНАСАУ ямар хариу барихыг харуулсан гэж БНАСАУ-ын удирдагч Ким Жон Ун мэдэгджээ.

“АНУ болон түүний дагуул улсуудын дайсагналыг зүгээр өнгөрөөхгүй. Солонгосын хойг дахь энх тайван, аюулгүй байдлын үндсийг ганхуулсан тэдний ухамсаргүй, хариуцлагагүй үйлдлийг гараа хумхин хараад сууж болохгүй” гэж тэрбээр онцолсон байна. Түүний хэлснээр, Вашингтон цаашид ч дайсагнасан үйл ажиллагаа явуулбал Пёньян илүү шийдэмгий давшилтад үйлдлээр хариу барих болно.

Энэхүү туршилтын дараа Умард Солонгосын удирдагч цөмийн хүчээ бэхжүүлэхэд чиглэсэн шинэ чухал зорилтуудыг дэвшүүлсэн хэмээн Солонгосын мэдээллийн төв агентлаг /KCNA/ дамжуулжээ.

Японы Батлан хамгаалах яамны тооцоолсноор, даваа гарагт /2023.12.18/ Умард Солонгоос харвасан тив алгасах пуужин 15 мянган км зайг туулах чадвартай байсан ба энэ нь АНУ, БНСУ, Япон болон бусад улсын аль ч цэгт чөлөөтэй хүрэх чадалтай байжээ. Мөн үүнтэй холбогдуулан Сөүл Пёньяны цэрэг, улс төрийн удирдлагыг устгах тусгай сургуулилт хийх боломжийг судалж байна хэмээн БНСУ-ын Батлан хамгаалахын сайд Шин Вон Сик мэдэгджээ.