Хамас хөдөлгөөний тэргүүн Синвар амь үрэгджээ

Израилын армийн Газын зурвасын өмнөд хэсэгт явуулсан ажиллагааны үеэр Хамас хөдөлгөөний улс төрийн товчооны тэргүүн Яхя Синвар амь үрэгджээ.

Нэг жилийн турш мөрдөж, мөшгөсний эцэст Израилын Өмнөд цэргийн тойргийн алба хаагчдын аравдугаар сарын 16-нд явуулсан ажиллагааны үеэр Яхя Синварыг устгалаа гэж Израилын арми мэдэгджээ. “Al Hadath” сувгийн дамжуулснаар, Израилын Зэвсэгт хүчин Рафах хотод Синварын хорогдож байсан барилгад цохилт өгөх үеэр Синвар амь үрэгдсэн байна. Израилын цагдаагийн газрын өгсөн мэдээллээр, Синварын цогцсыг түүний хурууны хээгээр таньсан байна.

Израилын Ерөнхий сайд Биньямин Нетаньяху Синварыг устгаснаар Газын зурвас дахь ажиллагаа нь дуусаагүй гэж мэдэгдээд энэ байгууллагын сүүлчийн өдрийн эхлэл гэжээ.

АНУ-ын Ерөнхийлөгч Жо Байден АНУ-ын тагнуулын албад Хамас хөдөлгөөний удирдагчдын байршлыг тогтооход Израилд тусалсан хэмээн мэдэгджээ. Синвар амь үрэгдсэнээр Израил, Хамасын хооронд газын зурваст гал зогсоох тохиролцоонд хүрэх боломж нээгдэж байна гэж АНУ-ын засаг захиргаа онцолсон байна.