АНУ-ын засаг захиргаа бусад улсаас нийлүүлж буй бараанд импортын татвар ногдуулах замаар АНУ-ын аж үйлдвэрийн бааз суурийг сэргээн босгохоор төлөвлөж байгаа тухай тус улсын Сангийн сайд Скотт Бессент телевизийн Fox Business сувгаар ярихдаа мэдэгджээ.
“Импортын татвар ногдуулах нь зорилгодоо хүрэх арга, харин зорилго нь АНУ-ын аж үйлдвэрийн бааз суурийг сэргээн босгоход оршино. Аль нэг улсын бараанд татвар ногдуулахад үйлдвэрлэл нь эргээд АНУ-д орж ирнэ. Ингэснээр ашгийн болон байгууллагын орлогын албан татвар нэмэгдэж, импортын татварын орлого ч, худалдааны алдагдал ч буурна. Импортын албан татвар нь АНУ-ын эдийн засгийн аюулгүй байдлыг сэргээх хэрэгслүүдийн нэг юм” гэж Америкийн сангийн сайд онцолсон байна.
“Харин Канад, Хятад, Колумби, Мексикийн бараанд татвар нэвтрүүлэх асуудал дэвшүүлсэн нь ашиг олох эрмэлзэл биш бөгөөд энэ стратеги нь хэд хэдэн төрлийн зорилготой байсан. Ерөнхийлөгч Доналд Трамп татвар нэвтрүүлнэ гэж сүрдүүлэхэд Колумбийн ерөнхийлөгч хууль бус цагаачдаа буцаан хүлээн авахыг зөвшөөрөөд зогсохгүй нисэх онгоц илгээхэд бэлэн байгаагаа илэрхийлсэн. Канад, Мексикийн бараанд импортын татвар ногдуулах тухай зарлигт Трамп гарын зурсны дараа Мексикийн ерөнхийлөгч Клаудиа Шейнбаум АНУ-тай залгаа хил рүүгээ 10 мянган цэрэг илгээхээр амласан бол Канадын ерөнхий сайд Жастин Трюдо хилийн хяналтаа чангатгана гэж мэдэгдсэн” гэж Бессент тэмдэглэжээ.
Сэтгэгдэл ( 0 )