Хамас Израилыг эмч, аврагчдын амийг хөнөөсөнд буруутгав

Израил Палестины Улаан хавирган сар нийгэмлэг болон иргэний хамгаалалтын албаны 14 ажилтныг Газын зурвасын өмнөд хэсэгт оршдог Рафах хотод хөнөөж, цогцсуудыг булсан хэмээн Палестины Хамас хөдөлгөөн мэдэгджээ.

Хамас хөдөлгөөн Израилын Рафах хотод үйлдсэн гэмт хэргийг эрс буруушааж байна. Хэдэн хоногийн өмнө холбоо тасарсан зургаан аврагч, Палестины улаан хавирган сар нийгэмлэгийн найман эмчийн цогцос тус хотод олдсон бөгөөд тэдний гарын хүлсэн байсан гэж мэдэгдэлд онцолсон байна.

Энэ сарын 27-нд Палестины Улаан хавирган сар нийгэмлэг Израилын цэргүүдэд саатуулагдсан есөн эмчийнх нь хувь заяа тодорхойгүй байна гэж мэдээлж байв. Рафах хот руу хөдөлсөн эмч нарын дөрвөн багийг Израилын цэргүүд бөмбөгдөлтөд өртсөн хот орчим саатуулснаас хойш эмч нартай холбоо тасарсан гэж тус нийгэмлэг тодруулж байсан юм.

Гуравдугаар сарын 18-нд Израилын арми Газын зурвас дахь цэргийн ажиллагаагаа сэргээж, агаараас хүчтэй цохилт өгч эхэлсэн билээ. Ингэснээр өнгөрсөн нэгдүгээр сард тогтоосон гал зогсоох дэглэмийг зөрчсөн юм. Израилын Ерөнхий сайдын тамгын газар энэхүү үйлдлээ Хамас хөдөлгөөний зүгээс АНУ-ын ерөнхийлөгчийн тусгай төлөөлөгч болон зуучлагч орнуудаас тавьсан саналыг хүлээн аваагүйтэй холбон тайлбарлаж байгаа юм.