Израил Грета Тунбергийн явж байсан хөлгийг саатуулжээ

Израилын хүчнийхэн Газын зурвас руу чиглэж байсан Шведийн экологийн идэвхтэн Грета Тунбергийн хөлгийг саатуулж, нэгжлэг хийжээ.

“Madleen” хөлөг дээр Грета Тунбергээс гадна Франц, Турк, Бразил, Шведийн иргэншилтэй нийт 12 хүн явж байжээ.

Израилын талын мэдээллээр, “Madleen” хөлгийн багийг Газын зурвасын эрэг орчмын хориотой бүсэд ойртож буйг анхааруулж, хүмүүнлэгийн тусламжийг Ашдод боомтоор хүргүүлэх санал тавьсан байна. Израилын тэнгисийн цэргийн мэдэгдсэнээр, олон улсын эрх зүйн хүрээнд Газын зурвасын усан хил рүү хөлөг онгоцнуудыг нэвтрүүлэхгүй байгаа аж.

“Эрх чөлөөний хөлгүүд” эвсэл нь 2010 онд байгуулагдсан бөгөөд Газын зурвасыг бүсэлснийг эсэргүүцэх идэвхтнүүдийг нэгтгэдэг байна.

Израилын талын мэдэгдсэнээр, идэвхтнүүдийг эх оронд нь буцаах бөгөөд тэдний тээвэрлэж байсан хүмүүнлэгийн тусламжийг хүмүүнлэгийн шугамаар хүргэх гэнэ.