Б.Пүрэвсүрэн: Анх хүүгээ гэдсэнд байхад хүний биеэс зүү гаргаж байлаа

Өчигдөр “Монгол ньюс” мэдээллийн төвд Хүн судлалын үндэсний төвийн захирал доктор, профессор Ж.Батсуурь, Анагаах ухааны доктор, их эмч Э.Энхмаа  Хавдартай тэмцэх холбооны ерөнхийлөгч, ”Биоэнергийн Судалгаа, Эмчилгээний Үндэсний Хүрээлэн” ТББ-ын тэргүүн Б.Пүрэвсүрэн, эмчлүүлэгчдийн төлөөлөл мэдээлэл хийлээ.

Тус төрийн бус байгууллагын тэргүүн Б.Пүрэвсүрэн жил гаруйн өмнө Хүн судлалын төвд ханджээ. Түүнээс ер бусын 40-45 хэмийн дулаан ялгаран, замдаа таарсан саад бэрхшээлийг даван туулдаг, өвөрмөц нил улаан туяа цацардгийг физикийн эрдэмтэд тогтоожээ. Ингээд тус төвд хандаж ямар учраас өвчин анагаагаад байгааг судлаж өгөхийг хүсчээ. Хүсэлтийн дагуу төвийн тэргүүн, хүн судлаач Ж.Батсуурь, Анагаах ухааны доктор, их эмч Э.Энхмаа нар нил улаан туяаг судлах ажлыг хийсэн аж. Судалгааны дүнд ийм төрлийн энерги бүхий хүн төдийлөн их төрдөггүй, ийм туяагаар хүн эмчилж байгааг олоогүй байна. Мөн түүний эмчлэгдэж буй өвчтөнүүдэд жил гаруйн хугацаанд  шинжлэх ухааны судалгаа хийжээ. Ингээд 40-45 хэмийн нил улаан туяа ялгардаг бөгөөд уг туяа нь хүний биед нэвт шингэж ороод, хүний эрхтэн системийн өвчлөл, үрэвсэл, хавдар идээ, буглаанд үйлчилж, голомтуудыг устгаж, эрүүлжүүлдэг гэдгийг ШУ-ны нарийн судалгааны явцад урьдчилсан байдлаар тогтоогоод байгаа гэлээ. Орчин цагийн анагаах ухаанд нил улаан туяаны энергээр эмчилдэг ШУ-ны арга нээгдээгүй байна. Иймд орчин цагийн анагаах ухаанд шинэ арга нэмэх үндэстэй хэмээн Хүн судлаач Ж.Батсуурь онцлов.

Одоогоор дэлхийн болоод Монголын хувьд ч айдсыг дагуулж, тулгарч буй өвчин нь хорт хавдар билээ. Түүнээс ялгарч буй нил улаан туяаг энэ хугацаанд судлаж, эмчилсэн үр дүн зэргийг нэгтгэн Хүн судлалын үндэсний төвийн тэргүүн Ж.Батсуурь Дэлхийн шинжлэх ухааны их хуралд илтгэхэд  нэн сонирхон хүлээн авчээ.  

Хурлын үеэр Анагаах ухааны доктор, их эмч Э.Энхмаа зарим өвчтөнүүдийн өвчний намтар, эмчилгээний дараах үр дүнг танилцуулсан юм. Үүнд элэг болон тархины хорт хавдар тусаж үхлийн ирмэгт тулаад байсан өвчтөнүүд ч сэтгэгдлээ хуваалцаад байв. Тухайлбал, н.Уртнасан элэгний наймдугаар сегментэд нь хавдар илэрч хавдараа авахуулах мэс засалд орсон байна. Энэ мэс заслаас хойш дөрвөн сарын дараа хоёр хавдрын голомт илэрч мэс засалд орсон ч, ахин хавдрын таван голомт илрээд хавдрыг тэжээгч судсыг боох эмчилгээ хийхээс өөр боломжгүй гэжээ. Харин өвчтөн боох эмчилгээ хийлгэлгүйгээр түүнд хандсан байна. Ингээд 340 удаагийн эмчилгээнд явж одоо хавдаргүй, элэгний бага зэрэг хатуурал л байгаа гэв.

Өдгөө тэрээр төрийн бус байгууллага байгуулж, оюуны болон зохиогчийн эрхээ аваад байна. Хавдартай тэмцэх холбооны ерөнхийлөгч, ”Биоэнергийн Судалгаа, Эмчилгээний Үндэсний Хүрээлэн” ТББ-ын тэргүүн Б.Пүрэвсүрэнтэй цөөн хором ярилцлаа.

-Өөрөөсөө ялгарч буй энергийн эмчилгээгээ хэзээ хийж эхэлсэн бэ. Ихэвчлэн ямар өвчтэй хүмүүс хандаж байна?

-Одоо 11 дэх жилдээ эмчилж байна даа. Төрөл бүрийн л өвчтэй хүмүүс ханддаг. Ялангуяа хорт хавдар давамгайлж байна. Иймд төрөл бүрийн хорт хавдар эмчлэгддэг юм байна гэдэг ШУ-наар батлагдаад байна.

-Анх өөрийгөө ийм энерги бүхий туяа цацруулдгаа яаж мэдсэн бэ?

-Хамгийн анх буюу 30 гаруй жилийн өмнө зүү залгиад эмнэлэгт хоёр сар болоод хагалгаанд орох гэж байсан хүнийг зайнаас эмчилж, зүүг нь гаргасан юм. Тэгээд тэр үед өөрийгөө ийм гэж мэдээгүй байж байгаад 2001 онд түгжрэл гаргаснаар л өөрийгөө нил улаан туяа бүхий энерги цацруулдгаа мэдэж эхэлсэн л дээ.

-Ямар хэлбэрээр эмчилгээ хийдэг нь сонин санагдаж байна?

-Гол нь зайснаас эмчилдэг. Ямар ч эм, тариа хэрэглэхгүй. Гараа тухайн өвчтэй хэсэгт наахад тэнд улаан туяа үлддэг.

-Таны биеэс 40-45 хэмийн туяа ялгардаг гэлээ. Үүнийг харах боломж бий юу?

-Тусгай аппаратаар л харна даа. Нүдэнд үзэгдэхгүй шүү дээ.

-Эмчлэгдэх хугацааг хүмүүс их сонирхдог?

 -Өвчнөөсөө шалтгаалаад янз бүр л байдаг юм. Арав, тав хоногийн дараа гээд үр дүн янз бүрийн цаг хугацаанд харагдаж эхэлдэг. Тухайлбал гурав, дөрвөн сар болоод хавдрын 50 хувь нь алга болдог ч тохиолдол бий.

-Хавдар бүрэн эмчлэгдэх боломжтой гэсэн үг үү?

-Бүрэн эмчлэгдэх боломж байна.

-Танд аав, ээжээс тань нил улаан туяа цацардаг бие заяажээ. Үр хүүхдэд тань уламжлагдах болов уу?

-Миний хоёр хүүхэд үүнийг өвлөж авч байгаа. 30 гаруй жилийн өмнө хүүгээ гэдсэнд нь байхад тэр хүний биеэс зүүг гаргаж байсан юм шүү дээ. Хүү маань надтай долоон жил эмчилгээ хийж байгаа. Мөн ЭМШУИС-д сурдаг юм. Охин минь ч гэсэн эмчилгээ хийдэг. Ээж аав хоёр маань 90 хүрчихсэн, эрүүл саруул байна. Аав, ээжид маань ч энэ энергээс байсан юм шиг байгаа юм. Сонирхуулахад аавын маань толгойд ширхэг цагаан үс ч байхгүй шүү.

-Та өөрийнхөө биеийн онцлогоос хуваалцахгүй юу. Ямар нэг өвчин, хууч байдаг уу?

-Гайгүй шүү. Бага байхад зүрхний өвчинтэй гэж байсан. Одоо хаана ч үзүүлсэн надад зүрхний өвчин байхгүй. Тухайн үед энергийн онцлогоос болоод зүрх муу гэдэг байсан юм болов уу гэж боддог. Бараг 18-аас илүү наслахгүй ч гэдэг байсан. Тэгээд хагалгаанд ор гэсэн ч ээж, аав маань зөвшөөрөөгүй.

-Олон өвчтэй хүн эмчилдэг шүү дээ. Таны биед нөлөөлдөг үү?

-Долгион ихтэй учраас ямар ч өөрчлөлт гардаггүй.

-Таны хувьд энэхүү энергитэйгээ мэдсэнээр эмч болчихлоо шүү дээ. Та ямар мэргэжилтэй хүн бэ?

-Би уг нь эдийн засгийн мэргэжилтэй хүн шүү дээ.

Х.Заяа