Яруу найраг гэдгийг би маш сайн мэднэ, гэхдээ яг энэ гэхээр мэдэхээ байчихдаг
Өнөөдөр дэлхийн яруу найргийн өдөр. 1999 оны гуравдугаар сарын 21-нийг ЮНЕККО-гоос Дэлхийн яруу найргийн өдөр хэмээн зарласан юм. Энэ өдөр дэлхий даяар уншиж, бичиж, нийтлэж, үзэл бодлоо шүлгийн мөрөөр илэрхийлэхийг дэмждэг ба хүн төрөлхтний сэтгэлгээний хязгааргүйг тунхагладаг аж.
Яагаад гэвэл, хүн төрөлхтнийг агуу их яруу найргууд холбож, нэгтгэх чадалтай. Уг нь олон улсад яруу найргийг аравдугаар сарын 15, эсвэл 5-нд тэмдэглэдэг байжээ. Учир нь энэ сард Ромын агуу найрагч Виржил хорвоод мэндэлсэн юм байна.
Шүлэг минь-хүлэг минь, чи бид хоёр
Шүүдэр мэлтрэн цэцэг уйлтал дуулах ёстой!
Шүлэг минь-хүлэг минь, чи бид хоёр
Сар мэлмэрэн хээр хонотол дуулах ёстой!
Алтан нар алган дээрээсээ мандтал дуулахад
Шүлэгч надад тэнгэрлэг нэгэн хоолой хэрэгтэй
Аялсан дуугаа алаг дэлхийд түгтэл давхихад
Хүлэг чамд тэнхээлэг нэгэн шандас хэрэгтэй
Шүлэг минь-хүлэг минь, чи бид хоёрт
Хүн ард минь захисан үггүй нэгэн захиас бий!
Шүлэг минь-хүлэг минь, чи бид хоёрт
Хүрэн зүрхэнд нууцалсан холын нэгэн бодол бий!
Унтаагүй нойр, уйдаагүй алжаал шүлэг минь,
Ухаан бодлоос босоогоороо төрсөн гуурст хүлэг минь
Молор эрдэнийн гуурсаа чи бид хоёрт харамлаагүй
Монгол түмнийхээ гавьяаг хэзээ ч мартах ёсгүй!
Шүлэг минь-хүлэг минь хурдлан давхи!
Хүлгийн шандас харуулахад холын зай хэрэгтэй
Хүн ардынхаа захиасыг санан санан давхи,
Хүлэг бид хоёрт дэлхийн дэвжээ хэрэгтэй!
Зуун хүлгийн түрүүчтэй дэлхийн найргийн дэвжээнд
Зуузай холбож гэмээ нь ард түмэн минь гомдохгүй
Зуур замын уртад ухаан, шандас сульдаад
Зулайдаа тоос хүргүүлэхийг бид хоёрт зөвшөөрөхгүй!
Шүлэг минь-хүлэг минь, чи бид хоёр
Шүүдэр мэлтрэн цэцэг уйлтал дуулах ёстой!
Шүлэг минь-хүлэг минь, чи бид хоёр
Сар мэлмэрэн хээр хонотол дуулах ёстой!
Б.Явуухулан /1977/
“Яруу найраг бол хүний оюун санааны гүн гүнзгий илэрхийлэл, харилцан ойлголцол, мэдрэмжийн хамгийн агуу хэрэгсэл мөн. Хэл, соёл, зан заншил үл хамааран ард түмнүүд яруу найргаараа ойлголцож, нэгнээ таньж чаддаг” ЮНЕСКО-гийн захирал Ирина Бокова
“Яруу найраг гэж юу болохыг би маш сайн мэднэ. Гэхдээ яг энэ гээд хэлчих гэвэл мэдэхээ байчихдаг” Абуль Фараж
Холбоотой мэдээ
Сэтгэгдэл ( 0 )