АНУ тэргүүтэй улсууд ОХУ, Донецк, Луганскийн эсрэг ХОРИГ АРГА ХЭМЖЭЭ авна

ОХУ Украины Донецк, Луганск мужийг тусгаар улс хэмээн хүлээн зөвшөөрсөнтэй холбогдуулан АНУ-ын Ерөнхийлөгч Жо Байден Донецк, Луганскт хөрөнгө оруулах, худалдаа хийхийг хориглосон зарлигт гарын үсэг зуржээ.

ОХУ Донецк, Луганскийг бүгд найрамдах улс гэж хүлээн зөвшөөрснөөр Минскийн хэлэлцээрээр хүлээсэн үүргээ зөрчихөөс гадна Украины тогтвортой, энх тайван, тусгаар байдал, газар нутгийн бүрэн бүтэн байдалд заналхийлж байна. Түүнчлэн, Москвагийн энэ шийдвэр нь АНУ-ын үндэсний аюулгүй байдал, гадаад бодлогод онц, ноцтой аюул учруулж байна гэж мэдэгджээ.

Үүнтэй зэрэгцэн АНУ-ын Сангийн яам ДБНУ, ЛБНУ-д хүмүүнлэгийн тусламж үзүүлэх зургаан тусгай лиценз гаргахаар болжээ. Эдгээр баримт бичиг нь ДБНУ, ЛБНУ-ын энгийн иргэдийн дэмжих зорилготой гэж тус яам тодруулсан байна.

ОХУ Украины Донецк, Луганск мужийг тусгаар улс хэмээн хүлээн зөвшөөрсөнтэй холбогдуулан Канадын эрх баригчид ОХУ-ын эсрэг эдийн засгийн хориг арга хэмжээ авна гэж тус улсын Гадаад хэргийн сайд Мелани Жоли мэдэгджээ.

Тэрбээр Канад улс холбоотнуудын хамтаар олон улсын эрх зүйг үл ойшоосон энэ үйлдэлд хатуу хариу барина гэж онцолсон байна.

Канад улс ОХУ-ын эл алхмыг эрс буруутгаж байна. Энэ алхам нь Минскийн хэлэлцээр, НҮБ-ын дүрмийг шууд зөрчиж, бүс нутгийн аюулгүй, тогтвортой байдалд ноцтойгоор заналхийлж байна гэж Мелани  Жоли мэдэгджээ.

Их Британийн Ерөнхий сайд Борис Жонсон өнөөдөр /2022.02.22/ Засгийн газрын “Cobra” онцгой байдлын хороог хуралдуулахаар болжээ. Хуралдаанаар Украины нөхцөл байдал, ОХУ Донецк, Луганскийг бүгд найрамдах улс гэж хүлээн зөвшөөрсөнтэй холбогдуулан авах хориг арга хэмжээг хэлэлцэх гэнэ.

Үүнтэй зэрэгцэн Австралийн Ерөнхий сайд Скотт Моррисон ОХУ-ын эрх баригчдад хандан, ДБНУ, ЛБНУ-ыг хүлээн зөвшөөрөх шийдвэрээс татгалзахыг уриалжээ. Австрали улс ОХУ-ын эсрэг хориг арга хэмжээ авах улс орнуудтай нэгдэнэ гэж Моррисон онцолжээ.

НҮБ-ын Ерөнхий нарийн бичгийн дарга Антониу Гутерреш ОХУ-ын шийдвэр нь Украины газар нутгийн бүрэн бүтэн байдал, тусгаар байдалд халдаж, НҮБ-ын дүрмийн зарчмуудыг зөрчиж байна гэж мэдэгджээ.

Украин ОХУ-аас НҮБ-ын дэргэд суугаа байнгын төлөөлөгчийн газарт хандаж, 24 цагийн дотор НҮБ-ын Аюулгүйн зөвлөлийн шуурхай хуралдаан зарлахыг шаарджээ. ОХУ НҮБ-ын Аюулгүйн зөвлөлийг даргалж байгаа билээ. Эл шаардлагыг Франц, АНУ, Их Британи, Норвеги, Ирланд, Албани, Мексик, Бразил зэрэг улс дэмжсэн байна.

Францын Ерөнхийлөгч Эммануэль Макрон Путины шийдвэрийг олон улсын эрх зүйг зөрчсөн үйлдэл гээд Европын улс орнууд үүний хариуд хориг арга хэмжээ авах болно гэж мэдэгджээ.

Европын комиссын тэргүүн Урсула фон дер Ляйен Украины салан тусгаарлах зорилготой хоёр мужийг тусгаар улс гэж хүлээн зөвшөөрснөөр ОХУ олон улсын эрх зүй, Украины газар нутгийн бүрэн бүтэн байдал, Минскийн хэлэлцээрийг бүдүүлгээр зөрчиж байна гэж буруутгасан байна.