Зургаан жил олон нийтийн сүлжээнээс ХОЛ байсан хүү 1800 доллар АВЧЭЭ

Хэн нэгэн танд зургаан жилийн турш олон нийтийн сүлжээнээс хол байсны тань төлөө 1800 доллар өгье гэвэл та зөвшөөрөх үү? Сиверт Клевсаас хэмээх хүү үүнийг зөвшөөрсөн бөгөөд ээж нь түүнд энэхүү саналыг 2016 онд тавьж байжээ. 

Тэрээр өнгөрөгч мягмар гарагт CNN-д өгсөн мэдээлэлдээ "Надад энэ маш гайхалтай санагдсан. Дахиад зургаан жил юухан байхав гэж бодогдсон" хэмээжээ. Уг саналыг хүлээж авахдаа тэрээр 12 настай байсан аж. Тэрээр 18 хүртлээ олон нийтийн сүлжээ ашиглахгүй байж чадах аваас түүнд 1800 доллар өгөхөө амалсан байна. 

Эцэст нь тэд хоёул хэлсэн амандаа хүрчээ.  Тэдний гэрээ 2022.02.19-нд дуусгавар болж хүү 18 насныхаа төрсөн өдрөөр 1800 доллар ээжээсээ авсан байна. 

Өнгөрсөн зургаан жилийн хугацаа түүнд тийм ч хэцүү санагдаагүй гэнэ. 12 настай байхдаа олон нийтийн сүлжээг тийм ч их ашигладаггүй байсан бөгөөд Snapchat-ийг ердөө нэг л өдөр ашиглаад устгаж байжээ. 

Сүүлийн үед болж байгаа мэдээллийг тэрээр найз нөхдөөрөө дамжуулан авдаг байсан гэнэ. Ийнхүү тодорхой хэмжээний хязгаарлалт тогтоосон нь түүнийг сурлага болон спортод анхаарахад ихээхэн тус болсон хэмээн ээж нь дурджээ. 

12 настайдаа тэрээр ирээдүйд авах 1800 доллараа байшин авахад зарцуулна хэмээн боддог байсан гэнэ. Харин одоо бол их сургуулийн дотуур байрны төлбөрөө хийхээр төлөвлөөд байгаа аж. 

Түүний хамгийн эхэнд хэрэглэж эхэлсэн олон нийтийн сүлжээ нь инстаграм бөгөөд одоогоор хэрхэн хэрэглэх учраа сайн олоогүй байгаа гэжээ.