Оюутан, сурагчид СХЗГ-ын хэмжил зүйн хүрээлэнгийн эталоны лабораториудтай танилцлаа

ШУТИС-ын Геологи, Уул уурхайн сургуулийн геодезийн хоёрдугаар курсын оюутнууд болон 84-р сургуулийн 11-р ангийн сурагчид өнөөдөр /2024.02.22/ Стандарт, хэмжил зүйн газрын үйл ажиллагаатай танилцлаа.

СХЗГ-ын дарга С.Батбаатар оюутан, сурагчдыг хүлээн авч, стандарт бол үйл ажиллагааны бүтээмж болон үр дүнг сайжруулах аргачлал болоод стандартын талаарх мэдлэг ойлголтоо нэмэгдүүлэхээр хүрэлцэн ирсэн та бүхэнд талархан эндээс олж, мэдсэн ойлголтоо бусдадаа түгээхийг уриаллаа. Үргэлжлүүлэн, СХЗГ-ын Хэмжил зүйн хүрээлэнгийн дарга Д.Дамбасүрэн байгууллагын үүсэл хөгжил үйл ажиллагааны чиглэл, цаашдын зорилтын талаар илтгэл тавьсан юм.

Илтгэлийн дараа оюутан, сурагчид уртын эталоны лаборатори болон масс, цахилгааны, цаг, давтамжийн эталоны лабораториудаар зочилж, танилцан мэдээлэл авч, сонирхсон асуултандаа хариулт авлаа.

Энэ үеэр ШУТИС-ын Геологи, Уул уурхайн сургуулийн геодезийн салбарын дэд профессор н.Эрдэнэчимэг: “Манай сургууль геодезийн сургалтын хөтөлбөрт шинэчлэл хийж, хөтөлбөртөө хэмжил зүй хичээлийг суулгаж өгсөн. Энэ хичээлийг үзэж, суралцаж буй оюутнууд өнөөдөр хүрэлцэн ирж, онолын мэдлэгийг практик дээр тэр дундаа улсын хэмжээнд үйл ажиллагаа явуулдаг ганц байгууллагад ирж, мэдлэгээ бататгаж байгаад талархаж байна” хэмээн хэлсэн юм.