Марин Ле Пенд Францын ерөнхийлөгчийн сонгуульд өрсөлдөхийг хориглов

Францын шүүх хэт барууны үзэлтэй “Үндэсний нэгдэл” намын тэргүүн Марин Ле Пенийг Европын Холбооны хөрөнгийг буруугаар ашигласанд буруутай гэж үзэн, таван жилийн турш сонгуульд өрсөлдөх эрхийг нь хязгаарлаж, 100 мянган еврогийн торгууль ногдуулжээ. Ингэснээр Ле Пен 2027 оны Францын ерөнхийлөгчийн сонгуульд өрсөлдөх боломжгүй болж байна. Францын шүүх түүнд дөрвөн жилийн хорих ял оноосноос хоёр жилд нь тэнсэн харгалзах ял, үлдсэн хоёр жилд нь Ле Пен цахим бугуйвч зүүх болжээ.

Ле Пен өөрөө шүүхийн эл шийдвэрийг улс төрийн зорилготой гэж мэдэгдэв. Ле Пен шүүхийн шийдвэр нь эрх зүйт төрийн зарчмыг бүрэн зөрчсөн гэж мэдэгдээд давж заалдана гэж амласан байна. Тэрбээр Францын Ерөнхийлөгч Эммануэль Макронд хандан өршөөл гуйхгүй. Учир нь давж заалдах шатны шүүх түүнийг буруугүй гэж үзэн гэдэгт итгэлтэй буйгаа илэрхийлсэн байна.

Ле Пенд 2027 оны ерөнхийлөгчийн сонгуульд ялах магадлал өндөр байгаа юм. Олон нийтийн санал асуулгаас үзвэл, тэр санал хураалтын эхний үе шатад 34-37 хувийн дэмжлэг авах боломжтой бөгөөд бусад өрсөлдөгдөө тэргүүлж байгаа билээ. Ле Пенийг ирэх сонгуульд өрсөлдөхийг нь хориглосноор өнөөгийн ерөнхий сайд Франсуа Байруугийн танхимыг улам сулруулна гэж шинжээчид үзэж байна.