Шинжээчид алтны үнийн төсөөллөө буулгалаа

Алтны дэлхийн зах зээлийн ханш 2018 оны нэгдүгээр улиралд дунджаар 1311 ам.доллар, хоёрдугаар улиралд 1314 ам.доллар байсан бол гуравдугаар  улиралд 1210 ам.доллар хүрч буурсан юм. Алтны зах зээлд АНУ-ын Холбооны нөөцийн банк Бодлогын хүүгээ арванхоёрдугаар сарын хурлаараа дахин нэмэгдүүлсэн, ам.долларын ханшийн чангаралт зэрэг нь алтны эрэлтийг сааруулж, үнэ буурахад голлон нөлөөлж байгаа аж.

Цаашид АНУ-ын ажилгүйдлийн бага түвшин хадгалагдах төлөв, Холбооны нөөцийн банк Бодлогын хүүгээ дахин нэмэгдүүлэх хүлээлтийн зэрэгцээ хөгжингүй орнуудын инфляци тогтвортой нам түвшинд хадгалагдахаар байгаа нь ам.долларын өгөөжийг нэмэгдүүлж 2018-2019 онуудад алтны үнэ буурах нөхцөлийг бүрдүүлэхээр байна. Гэхдээ алтны гоёл чимэглэлийн эрэлт 2019-2020 онд өсөхөөр байгаа. Мөн АНУ, БНХАУ хоорондын худалдааны зөрчилдөөн, хөгжиж буй орнуудын өсөлтийн төлөв буурсан болон дэлхийн зах зээл дээрх хувьцаануудын үнийн бууралт зэрэгт үндэслэн Блүүмберг, ОУВС-гийн шинжээчид 2018 оны алтны дундаж үнийн төсөөллийг 1265 ам.долларт хүргэж нэмэгдүүлсэн бол 2019 онд 1238 ам.доллар болж  буурахаар байна.