УЛС ТӨР: У.Хүрэлсүх "ИХ ЦЭВЭРЛЭГЭЭ"-гээ эхлүүлсэн 7 ХОНОГ

Нэгэн долоо хоног шувтарч байна. Хэдийгээр УИХ-ын намрын чуулган завсарлаж Төрийн ордон эл хуль байгаа ч энэ долоо хоногт улс төрийн үйл явдал арвин байлаа. Тухайлбал, Монгол Улсын Ерөнхийлөгч Х.Баттулга бүрэн эрхийнхээ хүрээнд ээлжит бус чуулганыг зарлан хуралдуулах саналыг УИХ-ын даргад хүргүүлсэн бол Ерөнхий сайд У.Хүрэлсүх намаасаа Ц.Сандуй, А.Ганбаатар, С.Мөнхчулуун нарт улс төрийн хариуцлага тооцож, МАН-ын гишүүнчлэлээс хасах шийдвэрийг гаргалаа.

Төрийн ордонд хоёр өдрийн турш “Орон нутгийн удирдах ажилтны зөвлөгөөн”-ийг зохион байгуулав. Түүнчлэн Татварын багц хуулийн төслийг хэлэлцэж, тодорхой шийдэлд хүрлээ.

Тусгай сангуудад хийсэн шалгалтын дүнтэй Засгийн газар танилцаж, ирэх долоо хоногт шалгалтын үр дүнг олон нийтэд ил болгох шийдвэрийг гаргасан зэрэг өнгөрч байгаа энэ долоо хоногт улс төрийн үйл явдал арвиан байлаа. Ингээд энэ долоо хоногт улс төрийн салбарт өрнөсөн ОНЦЛОХ үйл явдлыг тоймлон эргэн сануулж байна.

ЕРӨНХИЙЛӨГЧ ЭЭЛЖИТ БУС ЧУУЛГАНЫГ ХУРАЛДУУЛАХ САНАЛ ХҮРГҮҮЛЛЭЭ

Монгол Улсын Ерөнхийлөгч Х.Баттулга өнгөрсөн лхагва /2019.02.20/ гарагт УИХ-ын дарга Г.Занданшатарт “Ээлжит бус чуулган зарлан хуралдуулах тухай” албан бичгийг хүргүүллээ. Тэрбээр албан бичигтээ “УИХ-ын өмнөх дарга, гишүүдийн хооронд үүссэн зөрчил, тэмцлээс шалтгаалан төрийн эрх барих дээд байгууллагын үйл ажиллагаа 40 гаруй хоногоор гацаж, 2018 оны намрын ээлжит чуулганаар хэлэлцэхээр төлөвлөсөн 23 хууль, тогтоомжийн төслийн дийлэнхийг нь хэлэлцэлгүй орхин, шийдэл хүлээж байгаа нийгэм, эдийн засгийн амин чухал олон асуудал хойшлогдох нөхцөл үүссэн. Үүнтэй холбогдуулан Е/03 тоот албан бичгээр УИХ-ын даргад албан ёсоор хандаж, чуулганы хугацааг сунган хуралдуулах санал, шаардлагыг хүргүүлсэн боловч намрын ээлжит чуулганыг хуулийн хугацаанд нь завсарлуулаад байна.

Төрийн эрх барих дээд байгууллагын үр дүн муутай үйл ажиллагаа нь сахилга, хариуцлагыг бүх түвшинд алдагдуулж, нийгмийн хөгжлийг сааруулах, аливаа бэрхшээлийг гааруулах шалтаг, шалтгаан нь болох тул алдагдсан цаг хугацааг нөхөж улс орон, ард иргэдийн амьдралд тулгамдаж байгаа шийдэл хүлээсэн асуудлуудыг нэн даруй хэлэлцэн шийдвэрлэх арга хэмжээг шуурхай авах шаардлагатай юм.

Иргэд, олон нийт эрх баригч нам, УИХ, Засгийн газар болон холбогдох бусад төрийн байгууллага, албан тушаалтнуудаас “хууль тэгш үйлчилж, хэлбэрэлтгүй хэрэгждэг” шударга нийгмийг цогцлоох дорвитой бодлого, шийдэл хүлээж, шаардаж байна.

Монгол Улсын Үндсэн хуулийн 27.3, Монгол Улсын Ерөнхийлөгчийн тухай хуулийн 12.1, УИХ-ын тухай хуулийн 16 дугаар зүйлийн 16.2 дахь хэсэгт тус тус заасны дагуу гишүүдийн санал болгон шаардаж буй асуудлаар ээлжит бус чуулганыг 2019 оны гуравдугаар сарын 01-ний өдрийн дотор зарлан хуралдуулах саналыг хүргүүлж байна” гэжээ.

ХОТЫН ДАРГЫН СУНГААНД С.МӨНХЧУЛУУН ДАХИН НЭР ДЭВШИХЭЭ МЭДЭГДЭВ

Хотын дарга асан С.Батболд үүрэгт ажлаа хүлээлгэж өгч, оронд нь НИТХ-аас хотыг удирдах шинэ даргаар С.Мөнхчулууны нэрийг дэвшүүлж, Ерөнхий сайд У.Хүрэлсүхэд хүргүүлсэн байдаг. Гэвч Ерөнхий сайд У.Хүрэлсүх Хотын даргад нэр дэвшигч С.Мөнхчулууны нэрийг батламжлахгүй гэдгээ өнгөрсөн долоо хоногт албан ёсоор мэдэгдсэн билээ.

Тэгвэл эл асуудалд НИТХ-ын төлөөлөгч С.Мөнхчулуун өнгөрсөн мягмар гарагт /2019.02.190/ байр сууриа илэрхийлсэн юм. Тэрбээр "Ерөнхий сайд У.Хүрэлсүх бүрэн эрхийнхээ хүрээнд миний нэрийг батламжлахаас татгалзсан бичгээ ирүүлсэн байна. Надад утсаар мэдэгдсэн, бичгээ албан ёсоор гардаж аваагүй. Татгалзсан шалтгаан үндэслэлээ тодорхой бичээгүй болохоор надад ямар нэгэн байр суурь байхгүй. Гэхдээ би Хотын даргад дахин нэрээ дэвшүүлнэ" гэх тайлбарыг өгсөн юм.

МАН-ААС Ц.САНДУЙ, А.ГАНБААТАР, С.МӨНХЧУЛУУН НАРЫГ ХӨӨЛӨӨ

Хууль, хяналтын байгууллагаас МАН-ын нэр хүндийг газарт унагаж, “шороотой нь хутгасан” 60 тэрбумын хэргийг одоо ч эцэслээгүй, Авлигатай тэмцэх газар /АТГ/ болон Тагнуулын ерөнхий газар /ТЕГ/-ын хамтарсан Ажлын хэсэг мөрдөн шалгах ажиллагааг үргэлжлүүлж байгаа.

Гэсэн ч эрх баригч намынхан энэ хэрэгт нэр холбогдсон УИХ-ын дарга асан М.Энхболд, НИТХ-ын төлөөлөгч Ц.Сандуй, түүний туслахаар ажиллаж байсан А.Ганбаатар нарт улс төрийн хариуцлага тооцож эхэллээ. Өөрөөр хэлбэл, хэдхэн хоногийн өмнө МАН-ын Хяналтын ерөнхий хороо хуралдаж, төрийн өндөр албан тушаалыг 60 тэрбум төгрөгөөр үнэлж, наймаалцахыг завдсан хэрэгт нэр холбогдсон Ц.Сандуй, А.Ганбаатар нарыг намаасаа хөөх шийдвэрийг гаргаад байна.

Түүнчлэн НИТХ-ын төлөөлөгч С.Мөнхчулууныг намынхаа шийдвэрийг дагаагүй гэх шалтгаанаар МАН-ын гишүүнчлэлээс хаслаа. Учир нь, С.Мөнхчулуун намынхаа Удирдах зөвлөлөөс гаргасан Хотын даргад С.Амарсайханыг нэр дэвшүүлэх шийдвэрийн эсрэг зогсож, өөрөө заалнаас нэр дэвшиж ялалт байгуулсан билээ.

ТУСГАЙ САНГУУДАД ХИЙСЭН ШАЛГАЛТЫН ДҮНГ ИЛ БОЛГОНО

Засгийн газрын ээлжит хуралдаан өнгөрсөн лхагва /2019.02.20/ гарагт болж, хэд хэдэн асуудлыг хэлэлцэн шийдвэрлэлээ. Энэ үеэр тусгай сангуудад хийсэн шалтгалтын дүнтэй танилцсан юм. Тодруулбал, Ерөнхий сайдын өгсөн чиглэлийн дагуу Засгийн газрын тусгай сангуудад шалгалт хийсэн юм. Тариаланг дэмжих сан, Мал хамгаалах сан, Хөдөлмөр эрхлэлтийг дэмжих сан, Боловсролын зээлийн сан, Авто замын сан, Гэмт хэргийн хохирогчид нөхөн төлбөр олгох санд хийсэн шалгалтын дүнг сайд Ч.Хүрэлбаатар танилцуулсан.

Тариаланг дэмжих сан, Мал хамгаалах сан, Хөдөлмөр эрхлэлтийг дэмжих сан 2012 оноос хойш 938.8 тэрбум төгрөгийн дэмжлэгийг иргэн, аж ахуйн нэгжүүдэд олгосон байна. 2017 оны эцсийн байдлаар 395.3 тэрбум төгрөгийн авлагатай, 133.7 тэрбум төгрөгийн өглөгтэй гэсэн дүн гарчээ.

Тариаланг дэмжих сан 2018 оны есдүгээр сарын 31-ний байдлаар 141.1 тэрбум төгрөгийн өглөгтэй, 131.9 тэрбум төгрөгийн авлагатай байгаа бөгөөд хугацаа хэтэрсэн найдваргүй зээл 72 тэрбум төгрөг байна. Мал хамгаалах сан зээлийн журам боловсруулж мөрдөөгүй, зарим аж ахуйн нэгж, иргэн, байгууллагад зээлийг дахин олгодог, авсан зээлээ төлөөгүй байхад дахин зээл олгосон зөрчил илэрсэн байна.

Хөдөлмөр эрхлэлтийг дэмжих сангийн олгосон 17 тэрбум төгрөгийн зээлийн эргэн төлөлт хангалтгүй. Санхүүгийн дэмжлэгийн хэмжээг их хэмжээгээр хэтрүүлэн олгосон, дэмжлэг авсан иргэдээс төслийн явцын болон гүйцэтгэлийн тайлан авдаггүй, хуваарийн дагуу төлөлт хийдэггүй учир авлага өсөх хандлагатай гэж дүгнэжээ.

Боловсролын зээлийн сан болон суралцагч, захиалагчийн хоорондын гэрээнд суралцагч үүргээ биелүүлээгүй тохиолдолд хүлээлгэх хариуцлага тодорхой бус байгаа нь төлбөр эргэн төлөгдөхгүй удаашрахад нөлөөлж байна. Авто замын сангийн хөрөнгийн эх үүсвэрийг хуулинд тодорхой заасан ч зөвхөн авто зам ашигласны төлбөрөөр санхүүжиж, бусад эх үүсвэрийг бүрдүүлэх нөхцлийг хангаагүй байна.

Гэмт хэргийн хохирогчид нөхөн төлбөр олгох сан нь гэмт хэргийн улмаас амь насаа алдсан этгээдийн гэр бүлийн гишүүн, хүнд гэмтэл учирсан хохирогчид нөхөн төлбөр олгодог. Гэвч иргэд үүнийг мэддэггүй учир зөвхөн өргөдөл гаргасан иргэнд олгож иржээ. Торгох ялын төлбөрийн 60 хувийг санд төвлөрүүлж байгаа ч шүүхийн шийдвэрээр тогтоогдсон торгох ялын төлбөрийг бүрэн хэмжээгээр төвлөрүүлж төсөвт оруулж чадаж байгаа эсэхэд тавих хяналт хангалтгүй гэж үзжээ.

Тусгай сангуудын олгох зээлийн хүү банкны зээлийн хүүгээс доогуур учир арилжааны банкууд зээлийн эх үүсвэрийг урт хугацаагаар байршуулж ашиг олж байх магадлалтай гэж шалгалтын хэсэг дүгнэсэн байна. Дээрх сангуудын талаар цаашид авах арга хэмжээний төлөвлөгөө, санал боловсруулж, Засгийн газрын хуралдаанд танилцуулахыг сайд Ч.Хүрэлбаатарт даалгалаа. Түүнчлэн тусгай сангуудад хийсэн шалгалтын дүнг ирэх долоо хоногт олон нийтэд ил болгохоор болоод байна.

ТАТВАРЫН БАГЦ ХУУЛИЙГ ХЭЛЭЛЦЛЭЭ

УИХ-ын дарга Г.Занданшатарын санаачилгаар Төсвийн байнгын хорооноос эрхлэн Татварын багц хуулийн төслийг танилцуулах хэлэлцүүлгийг өнгөрсөн даваа гарагт /2019.02.18/ Төрийн ордонд зохион байгууллаа. Энэхүү хэлэлцүүлэгт УИХ-ын гишүүн Б.Баттөмөр, О.Батнасан, Д.Тогтохсүрэн, Б.Ундармаа, Ч.Улаан, Сангийн яам, Хууль зүй, дотоод хэргийн яам, Санхүүгийн зохицуулах хороо, Монголбанк, Татварын ерөнхий газар, Монголын Үндэсний Худалдаа Аж Үйлдвэрийн Танхим, Монголын Үйлдвэрчний Эвлэлийн Холбоо, Монголын бизнесийн зөвлөл, Монгол дахь АНУ-ын Худалдааны Танхим, Татварын төлөгчдийн эрх ашгийн хамгаалах холбоо, Монголын мэргэшсэн нягтлан бодогчдын институт, Татварын мэргэшсэн зөвлөхийн нийгэмлэг болон эрдэмтэн судлаачид зэрэг 100 гаруй төлөөлөгч оролцсон юм.

Хуулийн төслийг өнгөрсөн оны тавдугаар сарын 25-ны өдөр УИХ-д өргөн мэдүүлсэн бөгөөд анхны хэлэлцүүлэгт оруулахаас өмнө иргэд, олон нийт, судлаачдыг оролцуулан хэлэлцүүлэх хуулийн зохицуулалтын дагуу хэлэлцүүлгийг хийсэн байна. Мөн энэ удаагийн хэлэлцүүлэг нь УИХ-ын ээлжит бус чуулганыг хуралдуулах бэлтгэл ажлын нэг болж байгааг УИХ-ын гишүүн, Ажлын хэсгийн ахлагч Б.Баттөмөр онцолж байлаа.

ХУВИАРАА ТАКСИ ҮЙЛЧИЛГЭЭ ЭРХЭЛДЭГ ЖОЛООЧ НАРЫГ ТОРГОХ ШИЙДВЭРИЙГ ЦУЦЛАВ

Авто тээврийн тухай хуулийн хүрээнд хууль бусаар ДУУДЛАГЫН ТАКСИ ҮЙЛЧИЛГЭЭ эрхлэгчдийн үйл ажиллагаанд хяналт, шалгалт хийн, илэрсэн зөрчилд Зөрчлийн тухай хууль болон холбогдох хууль, тогтоомжийн дагуу торгох арга хэмжээ авч эхэлсэн тухай Нийслэлийн тээврийн газраас мэдээлсэн.

Тэгвэл Засгийн газрын хуралдаанаар дээрх асуудлыг хэлэлцэж, хувиараа дуудлагын такси үйлчилгээ үзүүлж буй  иргэдийг 100.000 төгрөгөөр торгох зохион байгуулалтыг зогсоох шийдвэр гаргалаа. Засгийн газраас иргэдийн халаас руу гар дүрсэн байдлаар торгуулийн арга хэмжээг давамгай хэрэгжүүлэх нь буруу хэмээн үзсэн бөгөөд холбогдох албан тушаалтнуудад үүрэг даалгавар өгөөд байна.