Хятадад буруу хариулт өгсөн сурагч багшдаа шийтгүүлж, нас баржээ

Хятадын Сычуань мужийн Цаньши сууринд буруу хариулт өгсөн сурагчаа багш нь зодсоны улмаас сурагч нь нас барсан хэрэг гарчээ. Синьхуа агентлагийн мэдээлснээр, урьдчилсан мөрдөн шалгалтаар Жан овогтой тавдугаар ангийн сурагч охинтой хамт найман хүүхэд мөн шийтгүүлсэн байна. Тооны багш Ван гэгч сурагчаа дөрвөн удаа алга руу нь цохиж, таван минутын турш өвдөглүүлж, суулгасан байна. Шийтгүүлснийхээ дараа сурагчийн толгой эргэж, биеийн байдал нь тавгүйрхсэн тул гэрт нь хүргүүлж, улмаар эмнэлэгт хүргэсэн байна. Тэрээр мөн өдрийн 15.30 цагийн орчим амьсгал хураажээ. Хохирогчийн ихрийн өрөөсөн хамт нэг ангид сурдаг ба шийтгэлийн үеэр охин ухаан алдах шахаж байсан гэж ярьжээ. 11.00 цагийн орчим багш охины эмээ Ян Жүсинд утастаж, охиныг гэрт нь аваачихыг хэлжээ. Гэртээ ирээд охин ярьж чадахгүй, нүдээ нээж чадахгүй байсан гэнэ. Эмнэлэгт бүхий л арга хэмжээ авсан ч охины амийг аварч чадаагүй байна. Эмээгийнх нь хэлснээр, ач охин нь сурагчиддаа гар хүрдэг тооны багшаасаа айдаг тухай эмээдээ ярьж байсан аж. Шүүх эмнэлэг Жангийн цогцост задлан шинжилгээ хийхэд, биед нь шарх сорви илрээгүй байна. Өдгөө түүний үхлийн шалтгааныг тодорхойлохоор ажиллаж байна гэж тус агентлаг мэдээлжээ.

Ван багш болон сургуулийн захирлыг ажлаас нь чөлөөлсөн байна.