Охид, эмэгтэйчүүд хөлсгүй хөдөлмөр эрхлэхэд өдөрт 4.7 цаг зарцуулдаг

Хүн амын амьдралын хэв маяг, өөрчлөлтийг тодорхойлох зорилготой Цаг ашиглалтын судалгааг дөрвөн жил тутамд зохион байгуулдаг. 

Энэхүү судалгаанд дурдсанаар, Монгол Улсын 12, түүнээс дээш насны хүн ам 7 хоногийн нэг өдрийн 9.2 цагийг унтахад, 2 цагийг олон нийтийн мэдээлэл ашиглахад, харин спортоор хичээллэхэд ердөө 6 минут зарцуулжээ. 

Хөлстэй болон хөлсгүй хөдөлмөр эрхлэлтийн хувьд хүйсийн ялгаатай байдал ажиглагдаж байгаа юм.

Тухайлбал охид, эмэгтэйчүүд хөлсгүй хөдөлмөр эрхлэхэд зарцуулж буй дундаж хугацаа нь 4.7 цаг байсан бол эрэгтэйчүүдийнх 2 цаг байна.

Үүнээс гадна 15, түүнээс дээш насны хүн амын цаг ашиглалтын байдлыг хөдөлмөр эрхлэлтийн байдлаар авч үзвэл, хөлстэй хөдөлмөр эрхлэхэд өдөрт дунджаар 6 цагийг зарцуулжээ. 

Тус үзүүлэлтийг хүйсээр нь харвал эрэгтэйчүүдийн хувьд 5.9 цаг, харин эмэгтэйчүүд 6.2 цаг байна гэж Үндэсний Статистикийн Хорооноос мэдээллээ.