“Нарны хороолол”-д тарваган тахлын сэжигтэй тохиолдол бүртгэгдлээ

"Нарны хороолол"-д өнөөдөр (2023.08.10) тарваган тахал өвчний сэжигтэй тохиолдол илэрчээ. Тухайн хүнийг тусгаарлан, дараагийн шатны үзлэг, шинжилгээг хийж байна. Тухайн иргэн Хэнтий аймгийн Баян-Адарга сумаас Улаанбаатарт иржээ.

Дуудлагын дагуу очсон эмчид өвчтөн "Тарваганы эрхтэн түүхийгээр идсэн" гэж мэдүүлсэн байна.

Хоёр хоногийн өмнө буюу 2023.08.08-ны өдөр Улаанбаатар хотод тарваган тахал өвчний нэг тохиолдол бүртгэгдсэн.

Хоёр өдрийн өмнөх эхний тохиолдлын хувьд "Иргэн Г наймдугаар сарын 2-нд найзын хамт Хэнтий аймгийн Биндэр сум руу явсан бөгөөд 4-нд тарвага идсэн байна. Харин наймдугаар сарын 7-нд хотод гэртээ ирж, 21:30 цагт түргэн тусламж дуудаж үзүүлсэн. Тус үзлэгээр тарваган тахлын сэжигтэй тохиолдол гэж үзэн, ХӨСҮТ рүү шилжүүлсэн нь батлагдсан" гэх мэдээллийг албаныхан өгсөн.

Өвчтөнийг ХӨСҮТ-д тусгаарлан, эмчилгээг эхлүүлж, нэгдүгээр хавьтлын 5 хүнийг мөн тусгаарлан, урьдчилан сэргийлэх эмчилгээ хийж байгаа. 

Яг одоо ХӨСҮТ, ЗӨСҮТ-ийн Шуурхай хариу арга хэмжээний баг ажиллаж байна. Шинжилгээний хариу дунджаар 8 цагийн дараа гарах ажээ.

ЗӨВЛӨМЖ

• Хууль тогтоомжид зааснаар тарвага агнах, тарваганы гаралтай түүхий эдийг худалдаалах, худалдан авах, тээвэрлэхгүй байх;

• Тарваганы дотор эрхтэн, махыг хэрэглэхгүй, гэртээ хадгалахгүй, хот, суурин газарт тээвэрлэж оруулахгүй байх;  

• Тарвага болон мэрэгч амьтны бөөс, бүүрэгт хазуулахаас сэргийлэх;

• Тарвагатай харьцсан, бөөс бүүрэгт хазуулсан, тарваганы арьс өвчсөн, мах эвдсэн болон идсэний дараа өндөр халуурах, толгой өвдөх, дотор эвгүйрхэх, нүүр нүд улайх, бүх бие, булчин өвдөх зэрэг шинж  тэмдэг илэрвэл эрүүл мэндийн байгууллагад яаралтай утсаар дуудлага өгнө үү!