Ч.Баттуулын хурлыг хойшлуулах хүсэлт гаргажээ

АНУ-ын иргэн Жон Мартин Кийнийг хөнөөсөн хэрэгт буруутгагдан хоёр шатны шүүхээс 23 жилийн ял сонсоод буй 25 настай Ч.Баттуулын хэргийг Улсын дээд шүүх өнөөдөр хэлэлцэнэ. Ч.Баттуулд хоёр шатны шүүхээс шунахайн сэдлээр хүний амь нас хөнөөсөн гэх үндэслэлээр 23 жилийн хорих ял оноогоод байгаа. Гэвч тэрээр өөрийгөө хэлмэгдсэн хэмээн Улсын дээд шүүхэд гомдол гаргаад байна. Харин Ч.Баттуулын өмгөөлөгч К.Бауржин гадаадад томилолтоор яваа учир хурлыг хойшлуулах хүсэлтийг Улсын дээд шүүхийн шүүх бүрэлдэхүүнд гаргажээ. Ч.Баттуул одоогоор ШШГЕГ-ын харьяа эмэгтэйчүүдийн 407 дугаар ангид хоригдож байгаа юм.  Хэргийг сануулбал, өнгөрсөн оны нэгдүгээр сарын 5-ны өдөр манай улсын хилээр орж ирсэн Америк иргэн Жон Мартин ор сураггүй алга болжээ. Монголд бизнес эрхлэхээр явсан хүүгийнх нь өмнөөс Ч.Баттуул хоёр сарын турш завгүй байгаа хэмээн хариулж байсанд эх нь сэжиг авч Монгол дахь АНУ-ын элчин сайдын яамд эрэн сурвалжилж өгнө үү хэмээх хүсэлт тавьжээ. Талийгаачийн цогцсыг гуравдугаар сард Төв аймгийн Эрдэнэ сумын нутаг, Цонжин болдгийн орчмоос олсон юм.