Хойд Солонгос АНУ-ыг “тоосонгүй”

АНУ-ын Ерөнхийлөгч Жо Байдены засаг захиргаа БНАСАУ-тай холбоо тогтоохоор өнгөрсөн хоёрдугаар сараас хойш оролдоод үр дүнгүй байгаа гэнэ. БНАСАУ-ын зүгээс сүүлийн нэг жилийн хугацаанд АНУ-д ямар нэгэн хариу өгөөгүй байгаа аж.

АНУ, Хойд Солонгосын хоорондын БНАСАУ-ын цөмийн болон баллистик пуужингийн хөтөлбөрийн тухай хэлэлцээ нь зогсонги байдалд ороод байгаа юм. Вашингтон хурцадмал байдал даамжрахаас урьдчилан сэргийлэхээр Хойд Солонгостой холбоо тогтоохоор оролдож байгаа аж.  АНУ НҮБ дэх БНАСАУ-ын төлөөлөгчөөр дамжуулан холбоо тогтоохыг ч оролдсон байна.

Өмнө нь АНУ-ын Ерөнхийлөгч асан Доналд Трамп, БНАСАУ-ын удирдагч Ким Жон Ун нарын гурван удаагийн уулзалтаар уг асуудалд бага зэрэг ахиц гарсан ч АНУ болон барууны орнуудын гол шаардлага болох БНАСАУ-ыг цөмийн зэвсгээс ангижруулах асуудлаар тохиролцоонд хүрч чадаагүй юм.

Түүнчлэн БНАСАУ-ын төрийн мэдлийн хэвлэл мэдээллийн хэрэгслүүд Жо Байденыг АНУ-ын Ерөнхийлөгч гэж хүлээн зөвшөөрөөгүй байгаа аж.