ОЛОН ӨНГӨ: Хамаг юм сайн сайхнаас эхэлнэ...

“Хамаг юм сайн сайхнаас эхэлнэ

Хаа холоос хүү минь ирэхээс эхэлнэ

Хайр дурлал, инээмсэглэлээс эхэлнэ

Хаврын бороо, цэцэгнээс эхэлнэ” хэмээх Д.Нямсүрэнгийн шүлгийн сайхан мөртүүд байдаг. Хэдийгээр цар тахалтай, хөл хориотой боловч хаврын тэр сайхан өдрүүд өнөөдөр ч гадаа байж л байгаа. Хорвоогийн сайн сайхан бүхнээр хүрээлүүлж амьдрахад эрх мэдэл, эд мөнгөний хэрэггүй бөгөөд нийтийг хамарсан өвчин зовлон, элдэв хориг цээр ч саад болж үл чадна. Гагцхүү бид өөртөө байгаа, эргэн тойрондоо буй зүйлсээ олж харахад гол учир нь бий. Алтан нар хэнээс илч гэрлээ харамладаг билээ дээ. Энд бас Японы Зэнгийн нэгэн богино үлгэр ч санаанд орж байна. Уулын оройд амьдардаг нэгэн ламынд хулгайч эзгүйчлэн очоод авах юу ч байгаагүйд гутраад бууж явахдаа ламтантай таарч л дээ. Үдшээр таарсан лам “Нэгэнт чи энэ хүртэл ирсэн юм чинь ядаж хувцсыг минь авна уу” гэхэд буруу харан байж тайлж аваад арилжээ. Түүнийг явсан хойно гэгээнтэн хожуул дээр суугаад тэнгэр ширтэнгээ “Болдог бол түүнд энэ сайхан сарыг өгөхсөн” гэсэн гэдэг.

Бас энд өнөөгийн сошиал орчны тухай ч дурдах нь зөв байх. Бид бүгдээрээ нэгэнт гар утасны хамааралтай болж байгаа хойно цахимаас юм үзэхдээ элдэв үнэн худал нь үл мэдэгдэх гүтгэлэг, бохир заваан юмыг сонирхохоос илүүтэй ядаж л хоолны бичлэг харж заншвал сэтгэлд амар шүү. Хиймэл оюун ухаан таны сонирхолд тааруулж л мэдээлэл илгээдэг юм шүү дээ.