НӨАТ-ын баримтын сугалааны тохирол өнөөдөр явагдана

Өнгөрөгч есдүгээр сарын 1-30-ны хооронд бүртгэгдсэн НӨАТ-ын баримтын сугалааны тохирол өнөөдөр /2024.10.16/ явагдана.

Тохирлыг 13 цагаас “Боловсрол” телевиз болон гар утасны “E-barimt” аппликэйшнаар орон даяар шууд дамжуулна. Түүнчлэн улирал тутамд иргэдийн дансанд шилжүүлдэг буцаан олголтыг энэ сарын 25-наас ирэх сарын 5-ныг хүртэл хийнэ гэдгийг албаныхан мэдэгдлээ. Үүнд аравдугаар сарын 8-ныг дуустал "E-barimt" системд бүртгүүлсэн бараа, үйлчилгээний төлбөр хамаарна.

Харин одоо 2024 оны IV улирлын НӨАТ-ын баримтууд "E-barimt" системд бүртгэгдэж байгаа юм.

Нэмэгдсэн өртгийн албан татварын тухай хуулийн 15.2.1-д зааснаар, тодорхой шаардлага нөхцөл хангасан татвар төлөгчийн тухайн улиралд албан татвар суутган төлөгчтэй хийсэн худалдан авалтад төлсөн албан татварын 20 хүртэлх хувийг буцаан олгоно гэж заасан байдаг.