Л.Оюун-Эрдэнэ “Эрдэнэт үйлдвэр”-ийн удирдлагуудыг ДУУДНА

Энэ улс оронд ус, агаар шиг үгүйлэгдэж буй зүйл бол хуулийг хийдүүлдэг эрх мэдэлтнүүдтэй  ХАРИУЦЛАГА тооцдог байх явдал юм.

Засгийн тэргүүн У.Хүрэлсүх  өнгөрсөн сард төрийн байгууллагын удирдах албан тушаалтнуудад үүрэг, чиглэл өгөхдөө “Дарга нараас нэн тэргүүнд ёс суртахуун, сахилга бат, хариуцлага шаардаж ажиллана.  Иймээс дор бүрнээ шударга, хариуцлагатай, идэвх зүтгэлтэй байж, ёс зүй, сахилга батыг эрхэмлэж ажиллах” ёстой гэж анхааруулсан. Мөн Ерөнхий сайд улс оронд, иргэдийн амьдралд үр өгөөжөө өгөх ёстой байсан хөрөнгө мөнгөний зарцуулалт хийгээд залилан завшсан асуудлуудыг илрүүлэн, хариуцлага алдсан этгээдүүдэд хуулийн хариуцлага хүлээлгэх нь энэ төр засгийн хийх ёстой ажил гэдгийг хэлж ярьж буй.

Түүгээр зогсохгүй, олон улсын зах зээлд бонд гаргаж, тэрбум тэрбумаар нь өр тавьж олж ирсэн мөнгийг Хөгжлийн банкаар дамжуулан тараахдаа эрх мэдэл, давуу талаараа дулдуйдсан, авсан зээлээ эргэж төлөхгүй гүлдийчихсэн нөхдүүдтэй хариуцлага тооцоход анхаарч ажиллахыг ЗГХЭГ-ын дарга Л.Оюун-Эрдэнэд үүрэгдээд байна.

Ерөнхий сайдаас үүрэг хүлээсэн ЗГХЭГ-ын дарга Л.Оюун-Эрдэнэ Хөгжлийн банкны Төлөөлөн Удирдах зөвлөл /ТУЗ/-ийн удирдлагуудыг дуудаж, зээлийн төлөлт, чанаргүй зээлийн эзлэх хувь зэргийг яаралтай нэгтгэж, танилцуулах үүргийг өгөөд байгаа. 

Тэгэхээр Засгийн газрын зүгээс шат шатандаа өгч буй үүргийг дагаж, мэдээллүүд тодрох байх гэсэн хүлээлт нийгэмд байна. Хөгжлийн банкаар дамжиж тараагдсан хэдэн их наядаар хэмжигдэх зээлийн зарцуулалт, эргэн төлөлтийн асуудлаар ил тод мэдээлэл гаргаж, улс орны хохирлыг барагдуулах чиглэлд ажиллах нь нийгмийн шаардлага ч гэж болно. Дашрамд өгүүлэхэд, Хөгжлийн банкаар дамжуулан тараагдсан мөнгөний дийлэнх нь Улаанбаатар хотын банк, Худалдаа хөгжлийн банк руу урссан байдаг нь бондын мөнгө бүлэглэлийн халаас руу орсон гэж хардах нэг өнцөг болдог. Өдгөө экс Ерөнхийлөгч Ц.Элбэгдорж адгаад буй нь Хөгжлийн банкийг луйвартаа ашигласан бүлэглэл үүрээ эвдүүлсэн шоргоолж шиг байдалтай байгаагийн илрэл ч байж болох.

Энэ мэтээр цааш үргэлжлүүлбэл “Эрдэнэт үйлдвэр”-ийн 51 болоод 49 хувьтай холбоотой асуудал дээр улс орны эрх ашгийг эхэнд эрэмбэлэх шаардлага тавигдсаар өнөөдрийг хүрч байгаа.

 

Л.Оюун-Эрдэнэ ЗГХЭГ-ын даргаар очихоосоо өмнө тус үйлдвэрийн 49 хувийг Сингапурын компанид зарах гэж байна гэх мэдээллийг хэвлэлийнхэнд өгч, “Монголын зэс” корпорацийн зүгээс хариу тайлбар хийгээд авсан. Тэгвэл ЗГХЭГ-ын дарга Л.Оюун-Эрдэнэ “Эрдэнэт үйлдвэр”-ийн удирдлагуудыг ойрын үед дуудаж уулзах гэж байгаа гэх мэдээлэл сонстлоо.

"Эрдэнэт"-ийн 49 хувьтай холбоотой асуудлыг шалгах, нягтлах шаардлага бий учраас энэ уулзалт иргэд, олон нийтийн анхаарлыг татах нь гарцаагүй.