"Хордлого авсан хүмүүст KFC-гээс санаа тавиагүй”
“Зайсан KFC” түргэн хоолны газарт 2019 оны хоёрдугаар сарын 8-15-ны өдрүүдэд хоол идсэн 200 гаруй иргэн хоолны хордлого болж, 40 гаруй иргэн Халдварт өвчин судлалын үндэсний төв /ХӨСҮТ/-д хэвтэн эмчлүүлсэн. Тэдний нэг болох 10 настай охины ээж, Баянзүрх дүүргийн иргэн И-тэй ярилцаж, биеийн байдал нь ямар байгаа талаар тодрууллаа.
-Танай хүүхдийн биеийн байдал сайжирсан уу?
-Биеийн байдал нь сайжирсан. Эмнэлэгт хэвтээд гарсан. Гүйлгэлт өгөх, гэдэс базалж өвдөж байсан нь зогссон. Одоо биеийн байдал нь сайжирсан ч ходоодонд нь ямар асуудал үүсч, өвчилснийг мэдэхгүй.
-Хэзээ KFC хоолны газраар үйлчлүүлсэн бэ? Анх танай хүүхдээс ямар шинж тэмдэг илэрсэн бэ?
-Хоёрдугаар сарын 9-ний өглөө 10:00 цагийн үед “Зайсан KFC” салбарт үйлчлүүлсэн. Бид зургуулаа орсон. Тахиа идсэн гурван хүүхэд гурвуулаа хордож, эмнэлэгт хэвтсэн. Хордсон хүүхдүүд маань 9, 10,12 настай хүүхдүүд байсан. Манай охин 10 настай. Хордлого өгсөн бол хүүхэд бөөлждөг шүү дээ. Гэтэл манай охин анх ерөөсөө бөөлжөөгүй. KFC-д орсныхоо дараа гүйлгэж, халуураад эхэлсэн. Халуураад байхаар нь ханиад хүрсэн юм болов уу гэсэн чинь юу ч идсэн гүйлгээд байсан. Тэгээд будааны шөл өгсөн ч зүгээр болоогүй.
Хэд хоногийн дараа хамт хоол идсэн хүүхдийн аав, ээж нь ярьж, “Хүүхэд маань гүйлгээд зогсохгүй байна” гэсэн. Хамт хоол идсэн 12 настай хүүхэд нь гүйлгэлт өгч, эмнэлэгт хэвтсэн. Цустай гүйлгэлт өгсөн юм билээ. Тэгэхээр нь идсэн хоолноосоо боллоо гэж бодсон. Би өөрөө анх охиноо эмчлэх гэж их хичээсэн. Мөн хувийн эмнэлэгт очиж үзүүлсэн. Халдвартад очиж үзүүлэх бодол байгаагүй. Гэтэл охины маань биеийн байдал сайжрахгүй болохоор нь хоёрдугаар сарын 14-ний өдөр ХӨСҮТ-д очиж үзүүлэхэд шууд эмнэлэгт хэвтүүлсэн. Эмнэлэгт хэвтсэн дариу ХӨСҮТ-ийн эмч нар дусал хийж, оройдоо бие нь гайгүй болсон. Дөрөв хоноод эмнэлгээс гарсан.
-KFC хоолны газраас та бүхэнтэй холбоо тогтоосон уу?
-Холбоо бариагүй. Мэргэжлийн хяналтын байгууллагаас ярьж, мэдүүлэг авсан. “Хохирлын хэмжээ, эм тариа худалдан авсан мөнгөний баримтаа өгөөрэй. Нөхөн төлбөрийг гаргуулж өгнө” гэсэн. Нөхөн төлбөр өгөх юм шиг байна лээ.
KFC ямар нэгэн байдлаар хариуцлага хүлээх ёстой. Сэтгэл санааны хохирол амссан олон хүн бий.
Надад гомдолтой байгаа зүйл нь, KFC-гийн хоёр ажилтныг цусан суулгацтай байсан юм шиг мэдээлэл тарсан байсан. Яг үнэндээ намайг хүүхдээ халдвартад үзүүлээд, эмчлүүлж байхад маш олон хүүхэд хоолны хордлого болж ирсэн. Олон хүүхэд өвдөж, халдвартад эмчлүүлж байхад KFC-ээс санаа тавиад эргэх ч юм уу, ар гэрийнхэнтэй нь холбоо тогтоож болно доо. Хордлого авсан хүмүүст KFC-гээс санаа тавиагүй. Над руу лав холбоо бариагүй. KFC ямар нэгэн байдлаар хариуцлага хүлээх ёстой. Сэтгэл санааны хохирол амссан олон хүн бий. Хүүхдээ өвдөхөд олон хоног санаа нь зовсон эцэг, эхчүүд цөөнгүй байгаа.
Манай эгчийн гэр бүл Зайсанд байдаг. KFC-д хоол идсэнийхээ дараа бас л бүгдээрээ хордсон. Тэднийх бүр томчууд нь хүртэл бүгд хоолны хордлого болсон. Хүүхэд нь аавтайгаа хамт эмнэлэгт хэвтсэн.
Холбоотой мэдээ
Сэтгэгдэл ( 2 )
Зайсан чинь хөрсний бохирдолоороо Монголдоо шдээ. Хуучин халдвартын эмнэлэг байсан, тэндээсээ дандаа бохир нь хальж торгуулж байдаг газар л байсандаа. Дээрээ сүрьеэгийн эмнэлэг, хорих анги олон жил байрлаж байсан гэхээр юуны өөд байхав дээ. Хижиг, цусан суулга, саломнелийн бактерууд чинь газрын хөрсөнд 60 жил хүртэл амьдарч байдаг юм чинь тэр хавийн усаар гараа угаасан ч өвдөх байлгүй, юун хоол хийх.
KFC arai dendej bna aa. Haacar taarna