"Болор цом 41" наадамд 21 яруу найрагч шигшмэл шүлгээ дуудна

Эгшиглэнт эхийн хишигт найрагч тодруулах “Болор цом” яруу найргийн 41 дэх удаагийн наадмын анхан шатнаас дараах 21 яруу найрагч шалгарчээ. Эдгээр яруу найрагчид энэ сарын 26-ны өдөр Соёлын төв өргөөнөө шигшмэл шүлгээ дуудаж, шилдгүүдээ тодруулна.

"Болор цом" наадамд шүлгээ сонордуулахаар шалгарсан 21 яруу найрагч:

1. А.Анхбаяр
2. Б.Алтанхуяг
3. Л.Баасансүрэн
4. Л.Батсайхан
5. Т.Батхүрэл
6. Б.Бүргэд
7. Э.Гантулга
8. Б.Ганхүрэл
9. Д.Галсансүх
10. М.Дэвээжаргал
11. Б.Лувсанпэрэнлэй
12. Г.Мишээл
13. С.Начин
14. Д.Өсөх-Эрдэнэ
15. Т.Пүрэвжаргал
16. Г.Хашбаатар
17. Ж.Эдмон
18. Х.Энхтөр
19. Э.Эрдэнэдалай
20. Д.Эрдэнэзулай
21. О.Элбэгтөгс

Өнгөрсөн оны "Болор цом" яруу найргийн наадамд 40 яруу найрагч шалгарснаас Архангай аймгийн Хотонт нутгийн хүү, яруу найрагч Мягмарын Амархүү түрүүлж, "Ургийн мод" шүлгээрээ "Болор цом"-ын эзэн болсон. Мөн яруу найрагч Д.Галсансүх "Сэтгэлзүйн тууриуд" шүлгээрээ дэд байр, яруу найрагч О.Цэнд-Аюуш "1218 оны дурсгалд" шүлгээрээ гутгаар байр, яруу найрагч Л.Моломжамц "Хуучин даавуу шиг", Ц.Гончиг "Хайрын зовлон яг ямар вэ" шүлгээрээ тус тус удаалсан юм.

"Болор цом 40" наадмын тэргүүн байр. Яруу найрагч, зураач Мягмарын Амархүү

"УРГИЙН МОД" хэмээх тоон хэлхээс

Есөн үед гурван зуун жил ургасан энэ ургийн мод

Ертөнцийн хатан хэвлийд өнө удаан цэцэглэсэн юм

Алтан нар, мөнгөн сар хүрэл мичидийг чамд л харуулах гэж

Анхилхан мөчрөн биеийг чинь нахиалуулж ирсэн юм

Таван зуун арван хоёр мөчиртэй энэ аварга модны орой одоо

Таашгүй өндөрт тэнгэрийн цэцэрлэгт цэцэглэж байдаг юм

Өндөр өвөг эмэг чинь болох хоёр зуун тавин зургаан зэсэн мөчир

Өдгөө диваажингийн төгөлд мөнх навчсаа салхилуулж байдаг юм

Гарьд начингийн өвөг шувууд салаа бүр дээр нь суугаад 

Гал улаахан жимснүүдийг нь цацруулан тоншиж байдаг юм

Холбоо өвөг эмэг чинь болох зуун хорин найман гуулин мөчир 

Хойд насны ойд ангаахайн үүрийг бүүвэйлж байдаг юм

Хангарьдын өвөг луун шувууд далавчаараа сэвээд

Хан боргоцойг нь унагалгүй эрхлүүлж байдаг юм

Хулан өвөг эмэг чинь болох жаран дөрвөн оюу мөчир

Хурмаст тэнгэрийн хаалгыг сахин энх навчсаа будруулж байдаг юм

Арслан заануудын өвөг сүнсэн биетнүүд нааш цааш холхин

Агаар гэрэлтсэн биесээрээ шөргөөж байдаг юм

Элэн өвөг эмэг чинь болох гучин хоёр номин мөчир

Эдүгээ Шамбалын цэцэрлэгт сувдан бороонд гэрэлтэж байдаг юм

Үлэг гүрвэлүүдийн өвөг хийн биетнүүд урагш хойш гүйлдэн

Үнэр түгээсэн биеэсээрээ шүргэж байдаг юм

Элэнц хуланц өвөг эмэг чинь болох хорин дөрвөн танан мөчир 

Энхжин Шамбалын хүрээлэнд галбирваасан модонд салаалаад

Хувилгаан орчлонд үлдээсэн дөрвөн салаа мөчрөө

Хугарч унахыг нь чагнаж зуун жилээр хүлээнэ

Ээж аав чинь гэх хоёр мөчрийг салаалуулсан

Эмээ өвөө чинь гэх дөрвөн салаа буурал мөчрүүд 

Үр ач нь гэх залуу ногоон мөчир чамайг улам улам 

Үзэсгэлэнтэйеэ ургахад чинь уярч баясаж жаргаад

Үлдсэн нас нь уртсаж цэнгэлийн манлайг эдлэнэ ээ

Энэ таван зуун арван хоёр мөчир хэмээх өндөр өвөг дээдэс чинь 

Энх орчлонд чамайг л төрүүлэх гэж эсэн мэнд амь зуухдаа 

Эртний болор бороонд хэдэн удаа мөр нь нороо бол

Ээмэг зүүлт, малгайн залаанаас нь хэчнээн дусал ус дусаа бол 

Тэр хоёр зуун тавин зургаан мөчир хэмээх өндөр өвөг дээдэс чинь 

Тэргэл хорвоод чамайг л мэндлүүлэх гэж энх тунх аж төрөхдөө 

Тэсгим хүйтэн жаварт хэдэн удаа хацраа хайруулж даараа бол

Тэрбум тэрбум цасан ширхэгийн хэчнээн нь толгойг бууралтуулж лавсаа бол

Мөнөөх л зуун хорин найман мөчир хэмээх өндөр өвөг дээдэс чинь 

Мөнгөн ертөнцөд чамайг л эрхлүүлэх гэж хавар намаргүй нүүж суухдаа

Модон тэрэгнийх нь дугуй хэдэн удаа эргэж, хэчнээн өвс налуулаа бол

Морин шоргоолж шүргэж хэчнээн олныг түйвээгээ бол

Өнөөх л жаран дөрвөн мөчир хэмээх өндөр өвөг дээдэс чинь

Өргөн замбуулинд чамайг л тарвалзуулах гэж өвөл, зунгүй өвөлжиж, зусахдаа

Өвөр хоорондоо хэдэн удаа шивнэлдэж, хэчнээн зул чимхээ бол 

Өчнөөн арслан чимээг нь чагнаж авдрынхаа нүүрэнд хулмайгаа бол

Гучин хоёр, арван зургаа, найман мөчир хэмээх өндөр өвөг дээдэс чинь

Гурван зуун жилийн өдөр шөнөөс өнөөдөр чамайг л авчрах гэж

Гуниг баярын орчлонд зүрхнүүд нь хэдэн удаа цохилж, хэчнээн жил гэрэлтээ бол

Гутал, оймсоо элээж, хэдэн удаа гүйж, хэчнээн жил алхаа бол доо

Элэнц, хуланц, элэн хулан өндөр өвөг эмгийн үргэлжлэл үр минь

Энэ тоонуудын нийлбэр бөөм чиний л цусаар гүйж байгаа

Энэ тоонуудын залгамж тавилан чиний л зүсээр гэрэлтэж байгаа...