ӨГЛӨӨНИЙ МЭНД!
Өнөөдөр 2024.01.26. Билгийн тооллын 16. Монгол эх оронд маань нар 08 цаг 28 минутад мандлаа, 17 цаг 41 минутад жаргана.
Улаанбаатар хотод цэлмэг. Өдөртөө -11 хэм, шөнөдөө -27 хэм. Та хувцасаа тохируулж өмсөөрэй.
Өнөөдөр Олон улсын гаалийн ажилтны өдөр, Дэлхийн экологийн боловсролын өдөр. Панамд Инженер, архитекторуудын баяр, Энэтхэгт Улс тунхагласны өдөр, Угандад Эрх чөлөөний өдөр.
Энэ өдөр “Sony” корпорацыг үүсгэн байгуулагч Акио Морита, АНУ-ын хүний эрхийн төлөө тэмцэгч Анжела Дэвис, Португалын хөлбөмбөгч, дасгалжуулагч Жозе Моуриньо, “Формула-1”-ийн нисгэгч Серхио Перес зэрэг алдартан мэндэлжээ.
Энэ өдөр дэлхий дахинд болсон онцлох үйл явдлууд:
1788 онд Сидней хотын суурь тавигдав. Тус хот Австрали дахь европчуудын анхны суурин юм.
1905 оны энэ өдөр Өмнөд Африк дахь “Premier” уурхайд 621 гр жинтэй “Куллинан” очир эрдэнэс олдов.
1939 оны энэ өдөр Вашингтон хотод болсон Онолын физикийн бага хурал дээр Нильс Бор цөмийн хуваагдлын нээлтээ танилцуулжээ.
1972 онд Хинтерхермсдорфт “DC 9” онгоц осолдож, 27 хүн амиа алдав. Онгоцны үйлчлэгч Весна Вулович 10 мянга гаруй метрийн өндрөөс шүхэргүй унасан ч амьд үлджээ.
1991 оны энэ өдөр Сомалийн Ерөнхийлөгч Сиад Барре эрх мэдлээ алдаж, танкаар өргөөнөөсөө оргон зугтаж байв.
2020 оны энэ өдөр АНУ-ын Калабаст “S-76” онгоц осолдож, алдарт тамирчин Кобе Брайант амиа алдав.
Өнөөдөр үс засуулвал Өвчин ирнэ.
Эл өдөр тахиа, могой жилтнээ аливаа үйлийг хийхэд эерэг сайн бол бар, туулай жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр эе эвээ ололцох, хамтын хөдөлмөр эхлэх, гэрээ хэлцэл байгуулах, найр хурим хийх, бэр гуйх, инж өгөх, авах, үнэт эрдэнийн зүйл авах, лус тахих, мал арилжих, буг дарах, газрын ам бооход сайн. Харин цөөрөм байгуулах, байшингийн суурь тавих, угаал үйлдэхэд муу. Өдрийн сайн цаг нь бар, туулай, могой, бич, нохой, гахай.
Хол газар явах бол баруун зүгт мөрөө гаргаад аян замдаа гараарай.
Өнөөдрийн ажилд тань амжилт хүсье.
Холбоотой мэдээ
Сэтгэгдэл ( 0 )