WEEK in BRIEF I Үндэсний орон сууцжуулалтын тухай хуулийн төслийг өргөн мэдүүлж, хоёр уулчин сураггүй болов

Мэдээллийн ZINDAA.MN сайт өнгөрч буй долоо хоногт дэлхий нийтэд  болон дотоодод болж өнгөрсөн онцлох үйл явдлын ээлжит тоймыг хүргэж байна.

-ҮНДЭСНИЙ ОРОН СУУЦЖУУЛАЛТЫН ТУХАЙ ХУУЛИЙН ТӨСЛИЙГ МОНГОЛ УЛСЫН ИХ ХУРЛЫН ДАРГА Г.ЗАНДАНШАТАРТ ӨРГӨН МЭДҮҮЛЛЭЭ-

Үндэсний баялгийн сангийн тухай хуульд “Хуримтлалын сан” газрын хэвлийн баялгийн үр өгөөжийг иргэн бүрд тэгш, шударга хүртээх зорилгоор эрүүл мэнд, боловсрол, орон сууцны зориулалтаар дэмжлэг үзүүлэхээр заасныг хэрэгжүүлэх зорилгоор Үндэсний орон сууцжуулалтын тухай хуулийн төслийг боловсруулан, өнгөрсөн долоо хоногт Засгийн газрын хуралдаанаар хэлэлцүүлж, ийнхүү Монгол Улсын Их Хуралд өргөн мэдүүлж байна гэж Ерөнхий сайд Л.Оюун-Эрдэнэ танилцуулав. Нийслэл Улаанбаатар хотын 50.1 хувь нь гэр хорооллын бүсэд амьдарч байна

Хүн амын орон сууцны тооллогын 2022 оны дүнгээс харахад манай улсын 941,547 өрхийн 32.1 хувь нь буюу 302,237 нь инженерийн дэд бүтэцтэй орон сууцанд амьдардаг бол 29.7 хувь буюу 279,639 өрх инженерийн дэд бүтцийн бүрэн хангамжгүй байшин хороололд, 38.2 хувь буюу 359,671 нь гэр сууцанд амьдарч байна.Өнөөдрийн байдлаар улсын хэмжээнд 29.1 мянган айлын орон сууц олон нийтийн нээлттэй зар дээр борлуулагдаж байгаагаас 66.0 хувь буюу 19.2 мянга нь шинээр ашиглалтад орсон, 34.0 хувь буюу 9.9 мянга нь хуучин орон сууц байна. мөн 2024-2025 онд нэмэлтээр 37.3 мянга айлын орон сууц шинээр ашиглалтад орохоор барилга угсралтын ажлаа эхлүүлсэн байгаа нь манай улсын орон сууцны зах зээл дээр 2024-2025 онд нийт 66.4 мянга айлын орон сууцны нийлүүлэлт үүсэхээр байна. 

Иймд орон сууцтай болох хүсэлтэй бага, дунд орлоготой иргэдэд зах зээл дээр байршиж буй дээрх 66.4 мянган айлын орон сууцны нийлүүлэлтийг ойртуулах бодлогыг төрөөс хэрэгжүүлэх, улмаар хувийн хэвшлийн өмчийн барилга ашиглалтыг сайжруулах, хөрөнгийн үр ашгийг нэмэгдүүлэх боломж бүрдэх юм.

-АЛГА БОЛСОН ХОЁР УУЛЧНЫ НЭГИЙНХ НЬ ЦОГЦСЫГ ОЛЖЭЭ-

Аврагчид Эверестийн оргил орчим алга болсон Монголын хоёр уулчны нэгийнх нь цогцсыг олсон тухай https://thehimalayantimes.com/ мэдээлжээ.

Нөгөө уулчин одоогоор олдоогүй байна. “8K Expeditions” компанийн захирал Лакда Шерпагийн хэлснээр, аврагчид Ц.Өсөхжаргалын цогцсыг 8550 м өндрөөс олжээ. Уулчин татсан олсноос доош, South Summit-аас хэдэн м доор унажээ. Шарилыг хэрхэх талаар ар гэрийнхэнтэй нь зөвлөлдсөний дараа авиралтын улирал дуусах үед шийднэ хэмээн Шерпа хэлсэн байна. 

Л.Пүрэвсүрэн уулчны хувь заяа одоогоор тодорхойгүй байна. Тавдугаар сарын 19-нд дараагийн цонх үе эхлэхэд эрлийн ажиллагааг үргэлжлүүлэхээр болжээ. 

thehimalayantimes.com

-ШИ ЖИНЬПИН, В.ПУТИН НАР ХАМТАРСАН МЭДЭГДЭЛ ГАРГАЛАА-

ОХУ-ын Ерөнхийлөгч Владимир Путин тав дахь удаагийн бүрэн эрхээ хэрэгжүүлж эхэлсний дараахан БНХАУ-д төрийн айлчлал хийлээ. ОХУ-ын Ерөнхийлөгч Владимир Путин, БНХАУ-ын дарга Ши Жиньпин нар хэлэлцээ хийж, иж бүрэн түншлэлийн харилцаа, стратегийн хамтын ажиллагааг гүнзгийрүүлэх тухай хамтарсан мэдэгдэл гаргав. Нэг улсын ноёрхол, блок хоорондын сөргөлдөөн, хүчний бодлого дэлхий дахины энх тайван, аюулгүй байдалд шууд заналхийлж байна гэж Ши Жиньпин онцлон тэмдэглэжээ. Бидний хэлэлцээ Орос, Хятадын баяр суурь олон улсын болон бүс нутгийн ихэнх асуудлаар ижил эсвэл ойролцоо буйг харууллаа гэж Владимир Путин онцолжээ.

-С.ЗОРИГИЙН ХЭРЭГТ ШАЛГАГДАЖ БАЙСАН ХҮМҮҮСИЙН ДНХ МЭДЭЭЛЭЛ ТОХИРООГҮЙ-

Цагдаагийн байгууллагаас С.Зориг бусдад алагдсан хэргийн мөрдөн шалгах явц, шинжилгээний талаар мэдээлэл өгөв.

Мөрдөн байцаах албаны хүнд гэмт хэргийг мөрдөн шалгах хэлтсийн дарга цагдаагийн хурандаа Б.Энхтөр: Эрүүгийн 830 142 дугаартай С.Зориг бусдад хутгалагдаж нас барсан хэрэгт Тагнуулын ерөнхий газар, Цагдаагийн ерөнхий газрын дарга нарын хамтарсан ажлын хэсэг байгуулах тухай тушаалаар байгуулагдсан ажлын хэсгээс мөрдөн шалгах ажиллагааг явуулж байна. Цагдаагийн байгууллагаас 1998 оны аравдугаар сарын 3-ны өдөр хэрэгт хураагдсан эд мөрийн баримтад АНУ-ын ДНХ шинжилгээний байгууллагын дэвшилтэт технологийг ашиглан энэ онд шинжилгээ хийлгэж, эд мөрийн баримтуудаас ДНХ мэдээлэл тогтоосон. Өнгөрсөн 26 жилийн турш мөрдөн шалгах ажиллагааг тасралтгүй явуулсан боловч анх удаа энэхүү ДНХ мэдээлэл шинээр тогтоогдсоныг ач холбогдолтой нотлох баримт гэж үзэж байна. Энэхүү ДНХ мэдээлэл нь урьд нь энэ хэрэгт холбогдуулан шалгагдаж байсан бусад хүмүүсийн ДНХ мэдээлэлтэй тохироогүй. Энэхүү ДНХ мэдээлэл нь хэний мэдээлэл болохыг тогтоох чиглэлээр хамтарсан ажлын хэсгээс мөрдөн шалгах ажиллагааг үргэлжлүүлэн явуулж байна гэв.

-1085 АВТОБУС УТАСГҮЙ ИНТЕРНЭТТЭЙ БОЛНО-

Түрээсийн гэрээг байгуулснаар Улаанбаатар хотын нийтийн тээврийн үйлчилгээнд явж буй автобуснуудыг тусгай төхөөрөмжөөр тоноглох бөгөөд ингэснээр нийтийн тээврээр үйлчлүүлж буй иргэд өндөр хурдны интернэтэд үнэгүй холбогдох боломжтой боллоо. Мөн 06:00-22:00 цагийн хооронд 14 цагийн турш мэдээ, мэдээлэл, соён гэгээрүүлэх, соёлыг түгээх агуулга бүхий контентыг цаг алдалгүй бэлтгэн, зорчигчдын хэрэгцээнд нийцсэн тэнцвэртэй, бодит мэдээ мэдээллийг хүргэнэ.Нийслэлээс баримталж буй бодлого шийдвэр, хэрэгжүүлж буй үйл ажиллагааны талаарх мэдээ, мэдээллийг олон нийтэд ил тод, шуурхай, тогтмол түгээх, мөн нийтийн тээврийн хэрэгслээр тав тухтай, зорчих боломжийг нэмэгдүүлэх зорилгоор нийтийн тээврийн хэрэгслийг утасгүй интернэтээр тоноглоно. Энэ хүрээнд автобусанд суурилуулсан самбар, дэлгэц болон дотор, гадна орон зайг зар сурталчилгааны зориулалтаар түрээслэх түрээслэгчийг шалгаруулах нээлттэй сонгон шалгаруулалтыг нийслэлийн Өмчийн харилцааны газраас  өнгөрсөн сарын 8-аас 26-ны өдрийн хооронд зохион байгууллаа. Сонгон шалгаруулалтад “Лариско медиа групп” ХХК шалгарсан юм.  Нийслэлийн Засаг даргын захирамжийн дагуу уг компанитай “Улаанбаатар хотын хөгжлийн корпо